वार्ताहर/ किणये
तालुक्यात नागपंचमी सणाला शुक्रवारपासून उत्साहात प्रारंभ झाला आहे. शुक्रवारी दुपारनंतर घरी नागाच्या मूर्ती आणण्यात आल्या. नागदेवताची विधिवत पूजा अर्चा करण्यात आली असून नागपंचमीचा मुख्य दिवस शनिवारी आहे.
ग्रामीण भागात नागपंचमी सण पारंपरिक पद्धतीने साजरा करण्यात येतो. यंदा कोरोनाच्या संकटामुळे बहुतांशी गावांमध्ये साधेपणाने हा सण साजरा करण्यात येत आहे. श्रावण महिन्यातील पहिला सण हा नागपंचमीचा आहे. हिरवाईने नटलेला शिवार या शिवारातील पीक पाणी बऱयापैकी होऊ दे, अशीही नागदेवताकडे शेतकरी मागणी करतात.
शुक्रवारी काही भागांमध्ये दुपारी तर काही ठिकाणी सायंकाळी नागाच्या मूर्ती अळूच्या पानातून आणण्यात आल्या. ग्रामीण परिसरात वेगवेगळय़ा पद्धतीने ही पूजा अर्चा करण्यात आली. शनिवारी नागपंचमीचा मुख्य दिवस असून या दिवशी महिला नवीन वस्त्र परिधान करून नागदेवतेची पूजा करतात. तसेच वारूळ व शिव मंदिरामध्ये दर्शनासाठी जातात.
श्रावणातल्या पहिल्या सणानिमित्त वेगवेगळय़ा प्रकारचा फराळ करण्याची परंपरा आहे. चिवडा, चकली लाडू आदी बनवितानाही महिला दंग होत्या. गावोगावी आपापल्या घरांमध्ये झोपाळे बांधण्यात आले आहेत. त्या झोपाळय़ावर बसून मुली आनंद लुटताना चित्रही पाहावयास मिळत आहे.
सुरेश लाड, मच्छे
नागपंचमीच्या सणानिमित्त घरात बनवलेला चकली, चिवडा, लाडू हा फराळ एकमेकांच्या पाहुण्यांच्या घरी देण्याची परंपरा आहे. मात्र यंदा कोरोनो असल्यामुळे गावात कोणी येऊ नये व बाहेर कोणीही जाऊ नये, असे पंचकमिटीच्यावतीने ठरविले आहे. याबाबत पुन्हा शनिवारी पंचकमिटीची बैठक बोलाविली आहे.
सुरेश डुकरे, किणये
नागपंचमीनिमित्त नातेवाईक, पाहुण्यांना फराळ देण्याची परंपरा आहे. मात्र, कोरोनाचा संसर्ग वाढू नये यासाठी सर्वांनी जागरुक राहायला हवे. भावनेच्या आहारी जाऊन कोणीही पाहुण्यांच्या घरी येणे-जाणे टाळावे..