एक महिन्यापासून रुग्णालयात दाखल
नवी दिल्ली
मागील एक महिन्यापासून रुग्णालयात दाखल केंद्रीय खाद्य तसेच सार्वजनिक पुरवठा मंत्री रामविलास पासवान यांच्यावर दिल्लीतील एका रुग्णालयात शस्त्रक्रिया करण्यात आली आहे. अचानक काही कारणांमुळे शनिवारी रात्री उशिरा त्यांच्या हृदयावर शस्त्रक्रिया करावी लागली आहे. आवश्यकता पडल्यास पुढील काही आठवडय़ांमध्ये दुसरी शस्त्रक्रिया करावी लागू शकते, अशी माहिती त्यांचे पुत्र आणि लोजप अध्यक्ष चिराग पासवान यांनी दिली आहे.
पंतप्रधान नरेंद्र मोदी, गृहमंत्री अमित शाह आणि संरक्षणमंत्री राजनाथ सिंग यांनी चिराग यांना फोन करून केंद्रीय मंत्र्यांच्या प्रकृतीची विचारपूस केली आहे. पासवान यांच्यावर हृदयाशी संबंधित दुसरी शस्त्रक्रिया करण्यात आली आहे. यापूर्वी बायपास शस्त्रक्रिया झाली आहे.
बिहार विधानसभा निवडणुकीत भाजपसोबतच्या आघाडीसंबंधी निर्णय घेण्यासाठी लोजपच्या संसदीय कार्यकारिणीची बैठक होणार होती. परंतु पासवान यांची प्रकृती बिघडल्याने ही बैठक पुढे ढकलण्यात आली आहे. रामविलास यांची प्रकृती बिघडल्याने विधानसभा निवडणुकीतील जागावाटप आणि अन्य मुद्दय़ांवर चर्चा करण्यासाठी बिहार दौऱयाला विलंब होऊ शकतो, असे चिराग यांनी काही दिवसांपूर्वी म्हटले होते.