प्रतिनिधी / इचलकरंजी
इचलकरंजी येथील एका अल्पवयीन युवतीची एकतर्फी प्रेमातून दुचाकीस्वारांनी पाठलाग करून तिची भर रस्त्यात अडवणूक केली. तिच्याशी अश्लील वर्तन करून तिला व तिच्या भावाला ठार मारण्याची धमकी दिली. ही घटना सोमवारी दुपारी शहरातील गजबजलेल्या चौकात घडली. याची पोलिसांनी गांभीर्याने दखल घेत एकतर्फी प्रेमातून पाठलाग करणारा व त्रास देणाऱ्या युवकाचा शोध घेऊन अटक केली.
सचिन संजय शिंदे (वय २०, रा. टाकवडे, ता. शिरोळ) असे त्याचे नाव आहे तर त्याच्या मित्राचा पोलिसांनी शोध सुरू केला आहे. याबाबतची नोंद गावभाग पोलिसात झाली आहे.
अल्पवयीन युवती शहरातील एका कनिष्ठ महाविद्यालयात शिक्षण घेत आहे. ती आज कामानिमित्त घराबाहेर अडली असता संशयित सचिन शिंदे आणि त्याच्या अनोळखी मित्रांनी दुचाकीवरून पाठलाग केला. शहरातील गजबजलेल्या चौकात पीडित युवती आली असता तिला या दोघांनी अडवले. माझे तुझ्यावर प्रेम आहे, असे म्हणत प्रेम नाही केलीस तर तुला आणि तुझ्या भावाला जीवे ठार मारणार, अशी धमकी दिली. हा प्रकार पीडिटेने नातेवाईकांना समजताच त्यांनी घटनास्थळी धाव घेतली. याबाबत पोलिसात तक्रार दाखल केली. पोलिसांनी घडल्या घटनेची गांभीर्याने दखल घेत एकतर्फी प्रेमातून अल्पवयीन युवतीची छेडछाड काढणाऱ्या संशयिताचा शोध घेऊन अटक केली.