मराठा मंदिर येथे होणार आयसोलेशन सेंटर, शंभर बेड्सची होणार व्यवस्था : दानशूर व्यक्तींनी सहकार्य करण्याचे आवाहन
प्रतिनिधी / बेळगाव
म. ए. समिती ही निवडणुकीपुरती मर्यादित नसून सर्वसामान्यांसाठी कार्य करणारी ही संघटना आहे. सध्या कोरोना संसर्ग झपाटय़ाने वाढत असून, आयसोलेशन, क्वॉरंटाईन, स्क्रिनटेस्ट यासारख्या वैद्यकीय चाचण्यांना सामोरे जावे लागत आहे. त्यामुळे महाराष्ट्र एकीकरण समितीच्यावतीने सर्वसामान्यांची सोय व्हावी याकरिता मराठा मंदिर येथे आयसोलेशन सेंटर सुरू करण्यात येणार आहे.
महाराष्ट्र एकीकरण समिती तसेच मराठा मंदिर व्यवस्थापनाची संयुक्त बैठक मंगळवारी मराठा मंदिर येथे झाली. या बैठकीत हा निर्णय घेण्यात आला. सध्या ऑक्सिजनचा तुटवडा असून, ऑक्सिजन उपलब्ध करून देणे, वेगवेगळय़ा हॉस्पिटल्समध्ये बेड उपलब्ध करून देणे यासाठी अनेक समस्या येत आहेत. त्यातच ज्यांना लक्षणे नाहीत त्यांना आयसोलेशन करण्यासाठी जागा उपलब्ध होत नसल्याने म. ए. समितीने आयसोलेशन सेंटर सुरू करण्याचा निर्णय घेतला आहे. यासाठी मराठा मंदिर व्यवस्थापनाने हॉल उपलब्ध करून दिला आहे.
या आयसोलेशन सेंटरमध्ये 100 हून अधिक जणांची राहण्याची व्यवस्था करण्यात येणार आहे. यासाठी लागणारे बेड व इतर वैद्यकीय साहित्य गोळा करण्याचे काम सुरू असून, आठवडय़ाभरात हे आयसोलेशन सेंटर सुरू केले जाणार आहे. यानंतर तालुक्मयाच्या इतर भागातही अशी सेंटर उभी करण्याबाबत विचार असल्याचे या बैठकीत सांगण्यात आले. या समाजोपयोगी उपक्रमासाठी जत्तीमठ देवस्थानच्या माध्यमातून 2 लाख 51 हजार रुपयांची देणगी जाहीर करण्यात आली आहे. तसेच दानशूर व्यक्तींनी सहकार्य करण्याचे आवाहन करण्यात आले आहे.
या बैठकीला समितीचे पदाधिकारी, मराठा मंदिरचे पदाधिकारी तसेच विविध संस्थांचे सदस्य उपस्थित होते.