प्रतिनिधी/ बेळगाव
न्यायालयांना उन्हाळी सुटी जाहीर झाली होती. दरवर्षी न्यायालयांना एक महिना सुटी दिली जाते. यावर्षीही एप्रिल अखेरपासून सुटी देण्यात आली होती. त्यानंतर आता सोमवारपासून न्यायालयांच्या नियमित कामकाजाला सुरुवात होणार आहे. त्यामुळे पुन्हा एकदा न्यायालये गजबजणार आहेत.
दिवाणी व जिल्हा न्यायालयांना सुटी दिली जाते. याचबरोबर काही जेएनएमसी न्यायालयांनादेखील सुटी देण्यात येते. त्यामुळे गेल्या महिन्याभरापासून न्यायालयामध्ये काहीसा शुकशुकाट पसरला होता. आता सोमवारपासून नियमित कामकाजाला सुरुवात होणार आहे.
बेळगावातील न्यायालयांमध्ये मोठ्या प्रमाणात खटले प्रलंबित आहेत. त्या खटल्यांचा तातडीने निकाल लागावा, अशी पक्षकारांची अपेक्षा असते. मात्र विविध सुट्या, तसेच इतर कारणांनी खटले प्रलंबित राहत आहेत. आता सोमवारपासून न्यायालये सुरू होणार असल्याने पक्षकारांनाही दिलासा मिळणार आहे.