प्रतिनिधी /बेळगाव
मराठी साहित्यातील ज्येष्ट कवी अशोक नायगावकर हे आज पंचाहत्तरीत पदार्पण करत आहेत. बेळगावमध्ये रविवारी त्यांचा आणि महेश केळुसकर यांचा ‘मस्करीका’ हा कार्यक्रम लोकमान्य रंगमंदिर येथे रसिकांच्या लक्षणीय उपस्थितीत पार पडला. यावेळी तरुण भारतचे समूहप्रमुख व सल्लागार संपादक किरण ठाकुर यांच्या हस्ते अशोक नायगावकर यांचा भव्य सत्कार करण्यात आला.
महाराष्ट्रात, मुंबईमध्ये विविध संस्थांच्यावतीने नायगावकर यांचा सत्कार होत आहे. या ज्येष्ट कवीच्या सत्काराचा पहिला मान बेळगावकरांना लाभला. किरण ठाकुर यांच्या हस्ते गुलाब फुलांचा भव्य हार, शाल, लामण दिवा देऊन नायगावकर यांचा सत्कार करण्यात आला. सत्काराबद्दल कृतज्ञता व्यक्त करतानाच बेळगावबद्दल आपल्याला विशेष जिव्हाळा असल्याचे नायगावकर म्हणाले.