नवी दिल्ली : ऑटोमोबाईल क्षेत्रातील कंपनी इसुझू मोटर्स इंडिया यांनी आर्थिक वर्ष 2023 मध्ये 25 हजार वाहने उत्पादन करुन बाजारात विक्री करण्याचा निर्णय घेतला आहे. सदरच्या कंपनीला भारतामध्ये अस्तित्वात येऊन जवळपास दशकाहून अधिक कालावधी लोटला असून यानिमित्ताने इसुझू मोटर्स इंडियाचे व्यवस्थापकीय संचालक वाटारु नाकानो यांनी ही माहिती दिली आहे.
गेल्या दहा वर्षापासून सदरची कंपनी भारतामध्ये आपली वाहने सादर करत असून अनेक आव्हानांना यादरम्यान कंपनीने सामोरे जात स्पर्धेत टिकून राहण्याचा प्रयत्न केला आहे. भारतामध्ये तयार होणारी उत्पादने आता शेजारच्या गल्फसह इतर देशांनाही निर्यात केली जाणार असल्याचे कंपनीने स्पष्ट केले आहे. चालू वर्षामध्ये देशांतर्गत उत्पादनांतर्गत 50000 वाहनांचा टप्पा कंपनीने नुकताच पार केला आहे.