प्रतिनिधी / बेळगाव
भटक्या कुत्र्यांच्या हल्ल्यात मृत्युमुखी पडलेल्या माकडावर सामाजिक कार्यकर्त्यांनी शहापूर स्मशानानजीक अंतिम विधी केला. आदर्श नगर वडगाव येथील मेघदूत कॉलनी उद्यानाजवळ भटक्या कुत्र्यांनी एका माकडावर जोरदार हल्ला करून त्याला ठार मारले. या भागातील काही नागरिकांनी ही घटना महापालिका सफाई कामगारांना कळवून मेलेल्या माकडाला कचरा गाडीतून देण्याची विनवणी केली.
मात्र कचरा गाडीवर असणाऱ्या राजेश गोल्लर यांनी सामाजिक कार्यकर्ते आणी स्वच्छता प्रभाग निरीक्षक संजय पाटील यांना याबद्दल कळविले. संजय पाटील यांनी सामाजिक कार्यकर्ते आणि शिवसेना जिल्हा संघटक रवींद्र जाधव तसेच मायक्रो औद्योगिक संघटनेचे पदाधिकारी रमेश देसुरकर, सामाजिक कार्यकर्ते मोहन पाटील यांना याबद्दल माहिती दिली. या सर्वांनी सदर मृत माकडाला शहापूर स्मशानभूमी नजीकच्या गायरान आवारात आणून तेथे त्याच्यावर अंतिम सोपस्कार केले.
संजय पाटील, रमेश देसुरकर आणि रवींद्र जाधव यांनी यावेळी त्या मृत माकडाला आदरांजली वाहिली. तसेच महापालिका प्रशासनाने भटक्या कुत्र्यांचा बंदोबस्त करावा अशी मागणी केली. माकडावर अंतिम संस्कार करताना संजय पाटील, रमेश देसुरकर, रवींद्र जाधव यांना राजेश गोल्लर, सफाई कामगार सुरज कांबळे, रमेश कोलकार, उळवाप्पा कोलकार, फकिराप्पा भोमन्नावर, राकेश कांबळे यांचे विशेष सहकार्य लाभले.
संजय पाटील हे नेहमीच सेवाभावी कार्यासाठी लोकांच्या अडीअडचणीला धावून जातात. ते एक आघाडीचे रक्तदाते आहेत. त्यांच्या या कार्याबद्दल उपस्थितांतून समाधान करण्यात आले.