धडाकेबाज आगमन…रचिन रवींद्र !
यंदा विश्वचषकात खेळणाऱ्या विविध संघांतून अनेक भारतीय वंशाचे खेळाडू मैदानात उतरलेत…मात्र त्यात सर्वांत जास्त लक्ष वेधून घेतलंय ते पहिल्याच सामन्यात शतक फटकावून ‘सनसनी’ माजविलेल्या रचिन रवींद्रनं…न्यूझीलंडच्या संघातील या मूळ भारतीय वंशाच्या खेळाडूच्या प्रवासावर टाकलेला दृष्टिक्षेप…
14 जुलै, 2019…ती रात्र ‘त्याला’ जणू काही कालचीच असल्याप्रमाणं आठवतेय…बेंगळूरच्या एका पबमध्ये बसून ‘तो’ एकदिवसीय सामन्यांच्या विश्वचषक स्पर्धेतील इंग्लंड व न्यूझीलंड यांच्यातील अंतिम सामना पाहत होता. तेव्हा ‘तो’ 19 वर्षांचा आणि वडिलांच्या क्रिकेट क्लबतर्फे नेहमीप्रमाणं भारताच्या वार्षिक भेटीवर आलेला…न्यूझीलंडला त्या लढतीत विश्वचषक अगदी हाताशी येऊन हुकला तो कुणी सर्वांत जास्त चौकार हाणलेत याची बेरीज मांडणारा वादग्रस्त नियम लागू करण्यात आल्यानं…या निकालानं स्वत: क्रिकेटपटू म्हणून उदयास येणाऱ्या त्या तरुणाच्या आशा-अपेक्षांचा चक्काचूर झाला असला, तरी त्याचबरोबर न्यूझीलंडचं प्रतिनिधीत्व करण्याची इच्छाही प्रबळ झाल्याशिवाय राहिली नाही…मात्र चार वर्षांनी त्याच विश्वचषकातील किवीज संघाच्या विजयी घोडदौडीचा मुख्य शिल्पकार आपण राहू अन् आपल्या नावाचा जयजयकार सुरू होईल असं ‘त्याला’ स्वप्नात तरी वाटलं होतं का ?…
रचिन रवींद्र…‘फॅनबॉय’ म्हणून मागील विश्वचषक पाहण्यापासून ते यंदाच्या स्पर्धेतील सर्वांत लक्षवेधी फलंदाजांपैकी एक बनण्यापर्यंत त्यानं घेतलेली झेप ही जबरदस्तच…न्यूझीलंडच्या क्रिकेटमधील सध्या सर्वांत वेगानं वाढणाऱ्या खेळाडूंमध्ये समाविष्ट होणारा रचिन हा डावखुरा फलंदाज, पण आपला डावखुरा फिरकी माराही खूप गांभीर्यानं घेणारा. त्यामुळंच अष्टपैलू म्हणून तों आपली ओळख प्रस्थापित करू लागलाय…त्यानं खरं तर विश्वचषक स्पर्धा सुरू होण्यापूर्वी सराव सामन्यात चुणूक दाखवून दिली होती. तरीही मुख्य स्पर्धेत तो इतका धुमाकूळ घालेल याची कल्पना कुणीही केली नव्हती. ही कामगिरी खुद्द आपल्या देखील अपेक्षांच्या पलीकडची हे रचिन रवींद्र कबूल केल्याशिवाय राहत नाही…
विश्वचषकातील पहिल्याच इंग्लंडविरुद्धच्या लढतीत रचिन रवींद्रच्या वाट्याला फलंदाजीत तिसरा क्रमांक आला तो दुखापतीतून न सावरलेल्या केन विल्यमसनच्या गैरहजेरीमुळं. विशेष म्हणजे त्यापूर्वी त्यानं एकदिवसीय सामन्यांमध्ये सहाव्या क्रमांकाच्या वर येऊन कधी फलंदाजी केलेली नव्हती अन् त्याच्या आठ डावांत फक्त एका अर्धशतकाचा समावेश होता. रचिनकडे भूमिका होती ती उशिरा येऊन हल्ला चढविण्याची किंवा खिंड लढविण्याची. मात्र विश्वचषकाच्या पंधरवडाभर आधी लॉर्ड्सवर इंग्लंडविऊद्ध केलेल्या 49 चेंडूंतील 61 धावांच्या खेळीतून त्याची जिगर दिसून आली होती, तर पाकिस्तानविरुद्धच्या सराव सामन्यात सलामीवीर म्हणून उतरून त्यानं 72 चेंडूंत 97 धावा फटकावल्या होत्या…
शिवाय देशांतर्गत क्रिकेटमध्ये वेलिंग्टन संघातर्फे सलामीचा येण्याचा अनुभव रचिन रवींद्रच्या खात्यात जमा होताच. इंग्लंडविरुद्धच्या पदोन्नतीविषयी बोलताना तो म्हणतो, ‘जेव्हा गॅरी स्टीड यांनी (न्यूझीलंडचे प्रशिक्षक) मला तिसऱ्या क्रमांकावर फलंदाजी करण्याबद्दल सांगितलं तेव्हा ते खूप रोचक वाटलं. मी तितकी अपेक्षाही केलेली नव्हती. कारण मी मिचेल सँटनरसोबत तळाशी म्हणजे नवव्या क्रमांकावर येऊन फलंदाजी करायचो’…न्यूझीलंडची ही चाल चालली अन् 23 वर्षीय रचिनलाही 2019 मधील संघाच्या पराभवाचे व्यवस्थित उट्टे काढता आले…
कसोटी क्रिकेटमध्ये पाऊल ठेवल्यानंतर जवळपास दोन वर्षांनी विश्वचषकातील इंग्लंड नि ऑस्ट्रेलियाविऊद्धची दोन अप्रतिम शतकं तसंच दोन अर्धशतकांच्या जोरावर ‘ब्रेकआउट स्टार’ म्हणून स्वत:ला प्रस्थापित करण्यात रचिन रवींद्र यशस्वी झालाय…यापैकी ऑस्ट्रेलियाविरुद्धची खेळी अगदी खास. कारण समोर प्रचंड मोठ्या आव्हानाचा डोंगर असताना देखील रचिन त्याची पर्वा न करता फटकेबाजी करत गेला. त्याचं अर्धशतक नोंदलं गेलं ते 49 चेंडूंत, तर त्यापुढच्या 50 धावांची भर घालण्यासाठी लागले फक्त 28 चेंडू. या झपाट्यामुळंच न्यूझीलंडसाठी सुरुवातीला अशक्यप्राय वाटणारं लक्ष्य आवाक्यात असल्याचं वाटू लागलं अन् शेवटी ‘फोटो फिनिश’प्रमाणं समाप्ती झाली…
या पार्श्वभूमीवर दक्षिण आफ्रिकेनंही साडेतीनशेच्या पार मजल मारल्यानंतर न्यूझीलंडकडून अन् खास करून रचिन रवींद्रकडून अपेक्षा होती ती त्याचीच पुनरावृत्ती घडविली जाण्याची. मात्र यावेळी त्यांना हे आव्हान पेललं नाही…पण म्हणून रचिनचं महत्त्व कमी होत नाही…या खेळाडूनं एकदिवसीय क्रिकेटमध्ये पदार्पण केलं ते अवघ्या आठ महिन्यांपूर्वी. त्याच्याकडे न्यूझीलंडच्या क्रिकेट मंडळानं अद्याप केंद्रीय करार केलेला नाही आणि ‘आयपीएल’मधील एखाद्या संघानंही त्याला आपल्या गोटात खेचलेलं नाही. असं असलं, तरी विश्वचषकानंतर या दोन्ही बाबी लवकरच साकारण्याची अन् यंदाच्या ‘आयपीएल’ लिलावात रचिन रवींद्र या नावला जबरदस्त भाव येण्याची चिन्हं स्पष्टपणे दिसू लागलीत !
बेंगळूरशी जोडलेलं नातं…
- रचिन रवींद्रचा जन्म 18 नोव्हेंबर, 1999 रोजी झाला तो न्यूझीलंडमधील वेलिंग्टन इथं…त्याचे वडीलही क्रिकेटचे जबरदस्त चाहते. त्यांनी दोन महान भारतीय खेळाडू राहुल द्रविड आणि सचिन तेंडुलकर यांची पहिली नावं एकत्र करून बनविलं ‘रचिन’…
- रवींद्रचे वडील रवी कृष्णमूर्ती आणि आई दीपा कृष्णमूर्ती या 90 च्या दशकात बेंगळूरहून वेलिंग्टनला दाखल झाल्या. रवी हे सॉफ्टवेअर इंजिनियर अन् बेंगळूरमध्ये असताना ते स्वत: क्लबस्तरीय क्रिकेट खेळायचे…ते भारताचा माजी वेगवान गोलंदाज जवागल श्रीनाथचे जवळचे मित्र…
- न्यूझीलंडमध्ये रवी कृष्णमूर्ती यांनी ‘हट हॉक्स क्रिकेट क्लब’ची स्थापना केली. ते त्यामार्फत दरवर्षी क्लबच्या तऊण सदस्यांना भारतात आणतात. याच माध्यमातून 2019 मध्ये आल्यावेळी रचिननं विश्वचषकातील तो अंतिम सामना पाहिला होता…
रचिनचा प्रवास…
- रचिन रवींद्रची गुणवत्ता लगेच नजरेत भरून न्यूझीलंडच्या 19 वर्षांखालील नि ‘अ’ संघांत त्याला स्थान मिळालं…2016 नि 2018 मध्ये 19 वर्षांखालील विश्वचषक स्पर्धांत न्यूझीलंडचं प्रतिनिधीत्व करण्याची संधी त्याला मिळाली…2018 च्या स्पर्धेत रचिननं केनियाविऊद्ध 117 व दक्षिण आफ्रिकेविऊद्ध 76 धावा अशा खेळी केल्या. पण त्याहून जास्त गाजली त्याची फिरकी. 13 बळींसह तो आघाडीचा गोलंदाज ठरला…
- 2021 साली रवींद्रनं मीरपूरमध्ये बांगलादेशविऊद्ध ‘टी20’ क्रिकेटमध्ये पदार्पण केलं खरं, परंतु तो खातं उघडू शकला नाही अन् बळीही मिळवू शकला नाही. शिवाय न्यूझीलंडला पराभव पत्करावा लागला…मात्र दुसऱ्या ‘टी20’ लढतीत उसळी घेत त्यानं तीन बळी घेतले…
- त्यानं कसोटीत पदार्पण केलं ते नोव्हेंबर, 2021 मध्ये भारताविरुद्ध, तर एकदिवसीय क्रिकेटमध्ये पाऊल ठेवलं यंदा मार्चमध्ये श्रीलंकेविरुद्धच्या सामन्यातून…
अनेक विक्रम…
- एकदिवसीय सामन्यांच्या विश्वचषकात पदार्पणातच शतक झळकावणारा रचिन रवींद्र हा न्यूझीलंडचा पाचवा आणि एकंदरित 17 वा फलंदाज. त्याचा साथीदार डेव्हन कॉनवेनं देखील इंग्लंडविरुद्धच्या त्याच सामन्यात हा पराक्रम नोंदवला…
- 23 वर्षं नि 321 दिवस वयानिशी रचिन विश्वचषकात पदार्पणातच शतक झळकावणारा एकंदरित तिसरा, तर न्यूझीलंडचा सर्वांत तऊण फलंदाज ठरलाय…
- त्याशिवाय कॉनवे (83 चेंडूंत शतक) अन् मार्टिन गप्टिल (88 चेंडूंत शतक) यांना मागं टाकत विश्वचषकातील सर्वांत वेगवान शतक फटकावणारा न्यूझीलंडचा फलंदाज ठरण्याचा मान त्यानं पटकावलाय…
- रचिन रवींद्रनं ऑस्ट्रेलियाविऊद्ध केवळ 85 चेंडूंत 116 धावा जमविताना ’मास्टर ब्लास्टर’ सचिन तेंडुलकरच्या एका खास विक्रमाशी बरोबरी केली. सचिन (1996 चा विश्वचषक) वगळता रवींद्र हाच तेवढा क्रिकेटच्या इतिहासातील असा एकमेव खेळाडू ज्यानं वयाची 24 वर्षं ओलांडण्यापूर्वी एका विश्वचषकात दोन शतकं झळकावून दाखवलीत…
रचिन ‘8’ क्रमांकाची जर्सी परिधान करतो तो बास्केटबॉलमधील सर्वकालीन महान खेळाडू कोबे ब्रायंटला मानवंदना म्हणून…
विश्वचषकात अग्रणी…
- रचिन रवींद्र सध्या विश्वचषकात सर्वाधिक धावा काढणाऱ्या फलंदाजांच्या यादीत दक्षिण आफ्रिकेच्या क्विंटन डी कॉकनंतर (545) दुसऱ्या क्रमांकावर विसावलाय. त्याच्या खात्यात आहेत 415 धावा…
- सध्या त्याची वाटचाल चाललीय ती न्यूझीलंडचा एका विश्वचषकात सर्वाधिक धावा काढणारा फलंदाज ठरण्याच्या दिशेनं. हा पराक्रम आहे केन विल्यमसनच्या नावावर (10 लढतींतून 578 धावा)…
रचिननंच वाचविली होती भारताविरुद्धची कसोटी…
रचिन रवींद्रच्या प्रतिभेची जगानं सर्वप्रथम दखल घेतली ती 2021 च्या भारताविरुद्धच्या कानपूर कसोटीमुळं. तो खरं तर त्याचा पहिलाच कसोटी सामना. परंतु त्यानं खेळपट्टीला चिकटून राहत चक्क 91 चेंडू खेळून 18 धावा काढल्या अन् शेवटचा गडी एजाज पटेलसमवेत (23 चेंडूंत 2 धावा) 9 षटकं टिकून राहण्याचं आव्हान पेललं. त्यामुळं भारताच्या हातातोंडाशी आलेला विजय हिरावून घेतला जाऊन लढत बरोबरीत सुटली…
क्रिकेटच्या तिन्ही प्रकारांतील फलंदाजी…
- प्रकार सामने डाव नाबाद धावा सर्वोच्च सरासरी शतकं अर्धशतकं
- कसोटी 3 6 1 73 18 14.6 – –
- वनडे 19 15 1 604 123 43.14 2 3
- टी20 18 16 5 145 26 13.18 – –
श्रीलंकेचा ‘अव्वल’ मदुशंका !
यंदाच्या विश्वचषक स्पर्धेत सर्वांत जास्त बळी मिळविलेल्या गोलंदाजांमध्ये सध्याच्या घडीला प्रथम स्थानावर पोहोचलाय तो श्रीलंकेचा डावखुरा गोलंदाज दिलशान मदुशंका. गुरुवारच्या सामन्यात भारताविरुद्ध मिळविलेल्या 5 बळींनी त्याला ही आघाडी मिळवून दिली असून प्रमुख गोलंदाजांच्या अनुपस्थितीत तोच श्रीलंकेचा मुख्य शस्र बनलाय…
यंदाच्या विश्वचषक स्पर्धेत श्रीलंकेची परिस्थिती विलक्षण खराब राहिलीय अन् त्यास दुखापतींमुळं प्रमुख खेळाडूंची अनुपस्थिती हे एक मोठं कारण राहिलंय यात शंका नाही. याचा तडाखा जसा त्यांना फलंदाजीत बसला तसाच गोलंदाजीतही स्वीकारावा लागला. स्पर्धा चालू असताना लाहिरु कुमारासारख्या वेगवान गोलंदाजाला गमावण्याचा प्रसंग त्यांच्यावर आला. त्यामुळं युवा, तुलनेनं कमी अनुभवी खेळाडूंवर मोठा भार पडला. या पार्श्वभूमीवर श्रीलंकेच्या माऱ्याला प्रतिस्पर्ध्यांच्या धावांच्या ओघाला रोखणं क्वचितच शक्य झालंय…अशाही स्थितीत विश्वचषकात सर्वाधिक बळी घेणाऱ्या गोलंदाजांच्या यादीत त्याच देशाच्या दिलशान मदुशंका याचं नाव अग्रभागी झळकलेलं असून तसं ते कुणी अपेक्षित केलेलं नसेल…
भारताविरुद्ध मुंबईत गुरुवारी झालेल्या सामन्यात त्यानं चक्क 5 बळी घेतले अन् हे बळीही कुणा तळाकडच्या फलंदाजांचे नव्हे, तर अव्वल फलंदाजांचे राहिले. त्याच्या एका अप्रतिम चेंडूने सामन्याच्या दुसऱ्याच चेंडूवर रोहित शर्माचा त्रिफळा उडविला, तर वेगात बदल करून टाकलेल्या दोन चेंडूंनी शुभमन गिल नि विराट कोहली यांना चकविले. त्यामुळे दोघांची शतक करण्याची स्वप्ने हुकली. सूर्यकुमार यादवचा अडथळा त्याने दूर केल्यानंतर श्रेयस अय्यरही त्याच्याच स्पेलच्या शेवटच्या षटकांत बळी पडला. यासरशी त्यानं आपले 5 बळी पूर्ण केले.
2011 मधील लसिथ मलिंगानंतर एकदिवसीय विश्वचषक स्पर्धेत पाच बळी घेणारा मदुशंका हा श्रीलंकेचा पहिला गोलंदाज आणि एकंदरित अशी कामगिरी करणारा त्यांचा चौथा गोलंदाज ठरलाय…यामुळं यंदाच्या विश्वचषकात एका सामन्यात 5 बळी मिळविलेल्या न्यूझीलंडच्या मिचेल सँटनर, पाकिस्तानचा शाहिन शाह आफ्रिदी यांच्या पंक्तीत तो जाऊन बसलाय आणि सर्वाधिक बळी मिळविणाऱ्या गोलंदाजांच्या यादीत 18 बळीनिशी आघाडीवर गेलाय. एडम झॅम्पा, मार्को जेनसेन व शाहिन शाह आफ्रिदी (प्रत्येकी 16 बळी) आणि जसप्रीत बुमराह (15 बळी) यांना त्यानं मागं टाकलंय…खरं तर विश्वचषकापूर्वी तो संघात असेल की नाही याची शंका होती. कारण तो दुखापतींनी ग्रासला होता. पण विश्वचषकात उतरण्यात यश मिळून त्याने चांगली कामगिरी करून दाखविली आहे…
18 सप्टेंबर, 2000 रोजी जन्मलेल्या मदुशंकाची जानेवारी, 2020 मध्ये 19 वर्षांखालील विश्वचषक स्पर्धेत श्रीलंकेचे प्रतिनिधीत्व करण्यासाठी निवड झाली. डिसेंबर, 2020 पर्यंत त्याला दक्षिण आफ्रिकेविऊद्धच्या मालिकेसाठी श्रीलंकेच्या कसोटी संघात सामील होण्यासाठी बोलावणे आले. एप्रिल, 2021 मध्ये त्याने पुन्हा एकदा बांगलादेशविऊद्धच्या मालिकेसाठीच्या श्रीलंकेच्या कसोटी संघात स्थान मिळवले. एप्रिल, 2022 मध्ये बांगलादेशविऊद्धच्या दुसऱ्या मालिकेसाठी मदुशंकाचे श्रीलंकेच्या कसोटी संघात पुनरागमन झाले, तर जूनमध्ये ऑस्ट्रेलियाविऊद्धच्या मायभूमीतील मालिकेसाठीच्या कसोटी संघातही त्याला स्थान देण्यात आले. त्याच वर्षी जुलैमध्ये पाकिस्तानविऊद्धच्या कसोटी मालिकेतही त्याची वर्णी लागली. पण शेवटी त्याचे कसोटी पदार्पण झाले ते यंदा 24 जुलै रोजी पाकिस्तानविरुद्ध…
गेल्या वर्षीच्या ‘टी20’आशिया चषक स्पर्धेसाठी श्रीलंकेच्या संघातही मदुशंकाला स्थान देण्यात येऊन त्याचे ‘टी20’ पदार्पण 27 ऑगस्ट, 2022 रोजी अफगाणिस्तानविऊद्ध झाले. या स्पर्धेतील भारताविऊद्धच्या सामन्यात त्याने आपल्या स्विंगच्या जोरावर वरच्या फळीला अडचणीत आणताना विराट कोहली, दीपक हुडा, रिषभ पंत यांना बाद करून 24 धावांत 3 बळी मिळविले होते आणि भारताला हा सामना गमवावा लागला होता…यंदा 10 जानेवारी रोजी दिलशान मदुशंकाने भारताविऊद्ध एकदिवसीय सामन्यात पदार्पण करताना रोहित शर्माला बाद करून त्याचा पहिला एकदिवसीय बळी मिळविला होता !
विश्वचषकातील श्रीलंकेच्या गोलंदाजांची उत्कृष्ट कामगिरी…
चमिंडा वास
- 2003 : बांगलादेशविरुद्ध 25 धावांत 6 बळी
लसिथ मलिंगा
- 2011 : केनयाविरुद्ध 38 धावांत 6 बळी
असांथा डिमेल
- 1983 : न्यूझीलंडविरुद्ध 32 धावांत 5 बळी
- 1983 : पाकिस्तानविरुद्ध 39 धावांत 5 बळी
दिलशान मदुशंका
- 2023 : भारताविरुद्ध 80 धावांत 5 बळी
खेळ जुनाच ओळख नवी ! : नेटबॉल
- नेटबॉलची उत्पत्ती इंग्लंडमध्ये 1890 च्या दशकात झाली अन् हा खेळ बास्केटबॉलच्या सुऊवातीच्या आवृत्तीतून उदयाला आला…आंतरराष्ट्रीय स्तरावर या खेळाच्या मानक नियमांचा एक संच तयार झाला तो 1960 च्या दशकात. आता नेटबॉल संघटनांच्या आंतरराष्ट्रीय महासंघाच्या खाली जगभरात अनेक संघ हा खेळ खेळताना दिसतात…
- नेटबॉल खेळाचा सामना 60 मिनिटांचा असतो अन् तो चार सत्रांत विभागलेला असतो. प्रत्येक सत्र 15 मिनिटांचे असते. पहिल्या आणि दुसऱ्या सत्रादरम्यान तसेच तिसऱ्या आणि चौथ्या सत्रादरम्यान तीन मिनिटांचे अंतर असते. दुसऱ्या आणि तिसऱ्या सत्रादरम्यान पाच मिनिटांचे मध्यांतर…एखाद्या खेळाडूला दुखापत झाल्यास त्याकरिता जास्तीत जास्त दोन मिनिटे दिली जातात…
- सर्वसाधारणपणे नेटबॉल सामन्यातील प्रत्येक संघात 7 खेळाडू असतात. असे असले, तरी किमान 5 खेळाडू असलेल्या संघांचाही सामना खेळविला जातो…
- नेटबॉल संघातील स्थाने ठरवून दिलेली असतात आणि त्यामुळे खेळाडू कोर्टवर त्या त्या क्षेत्रापुरते मर्यादित राहतात. यात गोल शूटर, गोल अॅटेक, विंग अॅटेक, सेंटर, विंग डिफेन्स, गोल डिफेन्स, गोलकीपर यांचा समावेश असतो…
- नेटबॉल कोर्ट हे बास्केटबॉल कोर्टपेक्षा मोठे म्हणजे 30.5 मीटर्स (किंवा 100 फूट) लांब आणि 15.25 मीटर्स (50 फूट) ऊंद असते. ते तीन विभागांमध्ये विभागलेले असते आणि त्यावरून खेळाडू कुठे राहू शकतात हे ठरते. या विभागांना ‘टू गोल थर्ड्स’ आणि ‘सेंटर’ किंवा ‘मिडल थर्ड’ असे संबोधले जाते…
- नेटबॉलचा खेळ एक कोर्ट, दोन टोकांना असलेले गोल आणि चेंडू वापरून खेळला जाऊ शकतो. या खेळात जेव्हा चेंडू ‘गोल थर्ड’मधील एखाद्या खेळाडूकडे जातो तेव्हा तो प्रतिस्पर्ध्याच्या ‘गोल रिंग’मध्ये चेंडू फेकून गोलाची नोंद करतो. नेटबॉलमध्ये फक्त ‘गोल शूटर’ किंवा ‘गोल अॅटेक’ हेच गोल करू शकतात आणि जेव्हा चेंडू फेकतात तेव्हा ते अर्धवर्तुळाकार क्षेत्रात असणे बंधनकारक असते…
- नेटबॉलचा सामना जिंकण्यासाठी प्रतिस्पर्ध्यापेक्षा जास्त गुण मिळवावे लागतात. चेंडू पास करून कोर्टवर फिरवणे आवश्यक असते. हा चेंडू अशा प्रकारे ‘गोल शूटर’ व ‘गोल अॅटेक’ची भूमिका बजावणाऱ्या खेळाडूंपर्यंत पोहोचवायचा असतो…
- जर एखादा खेळाडू अशा क्षेत्रात गेला की, जिथे तो असता कामा नये, तर ती ‘ऑफसाइड’ मानली जाते. तसेच खेळाडू तीन सेकंदांपेक्षा जास्त वेळ चेंडू धरून ठेवू शकत नाही अन् चेंडू ताब्यात असताना एकपेक्षा जास्त पावले टाकू शकत नाही. गोलाची नोंद होण्यासाठी फेकलेला चेंडू ‘रिंग्ड हूप’मधून जाणे आवश्यक असते…
- ‘गोल अॅटेक’ नि ‘गोल शूटर’ला चेंडू फेकण्यापासून अडविणे हे ‘गोल डिफेन्स’ आणि ‘गोलकीपर’चे काम असते आणि ते ‘शूटर’च्या पुढील पायापासून तीन फूट किंवा त्याहून अधिक अंतरावर असले पाहिजेत. अन्यथा तो अडथळा मानून उल्लंघन ठरविले जाते…अर्धवर्तुळाकार क्षेत्राच्या बाहेरून किंवा दोन निर्धारित ‘शूटर्स’च्या व्यतिरिक्त अन्य खेळाडूने फेकलेला चेंडू ‘हुप’मधून गेला, तरी तो गोल मानला जात नाही…
- बास्केटबॉलप्रमाणे येथे ‘ड्रिबलिंग’ करण्यास परवानगी नसते. तसेच प्रतिस्पर्धी खेळाडूच्या हातून चेंडू काढून घेता येत नाही वा खाली पाडता येत नाही…
– राजू प्रभू