ओटवणे प्रतिनिधी
The hunger strike of Madkhol villagers has been suspended for the fourth day
कनिष्ठ अभियंताचे लेखी आश्वासनं आणि तहसिलदार यांची मध्यस्थी
माडखोल धरणाच्या कालव्याचे प्रलंबित काम येत्या चार दिवसांत सोमवारपासुन सुरु करून लाभ क्षेत्रातील शेवटच्या शेतकऱ्याला पाणी देण्याचे लेखी आश्वासन आंबडपालचे कनिष्ठ अभियंता श्री मराठे यांनी दिल्यानंतर आणि सावंतवाडीचे तहसिलदार विलास उंडे यांच्या मध्यस्थीनंतर सोमवारपासुन गेले चार दिवस सुरु असलेले उपोषण माडखोल ग्रामस्थांनी गुरूवारी दुपारी स्थगित केले.
या उपोषणात ९० वर्षीय शांताराम सावंत आणि ७४ वर्षीय यशवंत गावडे आदी ग्रामस्थ गेले चार दिवस उपोषणाला बसले होते. या उपोषणा दरम्यान ९० वर्षीय शांताराम सावंत या वृद्धाची मंगळवारी प्रकृती ढासळल्याने त्यांना उपचारासाठी सावंतवाडी उपजिल्हा रुग्णालयात दाखल करण्यात आले होते. दरम्यान आंबडपालचे कनिष्ठ अभियंता श्री मराठे यांनी बुधवारी उपोषणकर्त्यां माडखोल ग्रामस्थांची भेट घेतली मात्र ठोस आश्वासनाअभावी आणि माडखोल ग्रामस्थांच्या आक्रमक पवित्र्यामुळे त्यांना माघारी फिरावे लागले.
गुरूवारी सावंतवाडीचे तहसिलदार विलास उंडे यांनी उपोषणकर्त्यां माडखोल ग्रामस्थांची भेट घेतल्यानंतर पाठोपाठ आंबडपालचे कनिष्ठ अभियंता श्री मराठे आले. यावेळी संतप्त उपोषणकर्त्यां माडखोल ग्रामस्थांनी त्यांना धारेवर धरले. त्यांनतर तहसिलदार विलास उंडे यांच्या मध्यस्थीनंतर माडखोल धरणाच्या कालव्याचे प्रलंबित काम येत्या चार दिवसांत सोमवारपासुन सुरु करून लाभ क्षेत्रातील शेवटच्या शेतकऱ्याला पाणी देण्याचे लेखी आश्वासन श्री मराठे यांनी दिल्यानंतर माडखोल ग्रामस्थांनी उपोषण स्थगित केले.