क्रीडा प्रतिनिधी /मडगाव
गोव्याची आंतरराष्ट्रीय बॅडमिंटनपटू तनिशा क्रास्टोने स्कॉटलँड येथे झालेल्या स्कॉटीश ओपन 2021 आंतरराष्ट्रीय चॅलेंज बॅडमिंटन स्पर्धेत रौप्यपदक मिळविले. तनिशाने छत्तीसगडचा आपला दुहेरीतील जोडीदार इशान भटनागरच्या साथीने मिश्र दुहेरीत अंतिम फेरी गाठली होती.
ग्लॅस्गो येथे झालेल्या या स्पर्धेत तनिशा-इशान जोडीने उपान्त्यपूर्व फेरीत स्कॉटलंडची आठवे मानांकनप्राप्त आलेक्सझांडर डून व स्कोसियारा टॉरेन्स जोडीचा 21-14, 21-11 असा पराभव करून उपान्त्य फेरी गाठली होती. उपान्त्य फेरीत तनिशा-इशानने डॅन्मार्कच्या जॅस्पर टॉफ्ट व डॅनक्लारा ग्रेवरसन जोडीला 21-19, 21-14 असे हरविले आणि अंतिम फेरी गाठली. मात्र अंतिम फेरीत त्यांना पाचवे मानांकन लाभलेल्या इंग्लंडच्या कॅलम हॅमींग व जेसिका पग या जोडीने 21-15, 21-17 असे हरविले.