अनेक राजकारण्यांचे सोशल मीडिया अकौंट हॅन्डल करणाऱया कंपनीवर धाड
प्रतिनिधी/ बेंगळूर
माजी मंत्री डी. के. शिवकुमार यांच्यासह अनेक राजकीय नेत्यांचे सोशल मीडिया अकौंट हॅन्डल करून प्रचार करणाऱया ‘डिझाईन बॉक्स’ या कंपनीच्या बेंगळूरमधील मुख्य कार्यालयावर मंगळवारी प्राप्तिकर अधिकाऱयांनी छापा टाकला आहे. नरेश अरोरा हे या कंपनीचे मालक आहेत.
डिझाईन बॉक्स ही कंपनी डी. के. शिवकुमार यांच्या निवडणूक सर्वेक्षणाची जबाबदारी सांभाळत होती. मागील महिन्यात या कंपनीशी शिवकुमार यांनी करार रद्द केल्याचे समजते.
बेंगळूरमधील कावेरी जंक्शनजवळील पॅलेज गुट्टहळ्ळी रोडवरील डिझाईन बॉक्स कंपनीच्या कार्यालयावर धाड टाकून प्राप्तिकर अधिकाऱयांनी तपासणी केली. मंगळवारी सकाळी 6ः30 वाजता ही कारवाई करण्यात आली. कंपनीची बिले, कागदपत्रे तसेच कॉम्प्युटरमधील डेटा तपासणी केली. दोन कारमधून आलेल्या आठ अधिकाऱयांच्या पथकाने ही कारवाई केली.
देशातील अनेक राजकारण्यांचे प्रमोशन करणारी ही कंपनी आहे. काँग्रेस प्रदेशाध्यक्ष डी. के. शिवकुमार, आमदार एन. ए. हॅरिस यांचा पुत्र मोहम्मद नलपाड यासह अनेक राजकारणी या कंपनीकडून प्रचार, प्रमोशन सेवा मिळवित आहेत. डिझाईन बॉक्स कंपनी या नेत्यांचे सोशल मीडिया अकौंट हॅन्डल करून त्यांचा प्रचार करते. या मोबदल्यात मोठी रक्कम वसूल करते, अशी माहिती उपलब्ध झाली आहे. या कंपनीचे खाती असणाऱया दोन बँकांमध्येही जाऊन प्राप्तिकर अधिकाऱयांनी माहिती जमविल्याचे समजते.
डिझाईन बॉक्स कंपनी सध्या पंजाबमधील काँग्रेस सरकारच्या प्रचारात व्यग्र आहे. राजस्थान, छत्तीसगड, पुद्दुचेरी या राज्यांच्या निवडणुकीतही या कंपनीने राजकीय सोशल मीडिया अकौंट हॅन्डल करून प्रचार केला होता.