धामोड / वार्ताहर
धामोडपैकी नऊनंबर (ता.राधानगरी ) येथे जनावरांच्यावर पहिल्यादांच ‘लंपी ‘ ( त्वचा रोग ) या विषाणूजन्य साथीच्या रोगाने आक्रमण केले आहे. तालुक्यात पहिल्यांदाच हा लंपी रोग आढळून आला आहे. त्यामूळे दूध उत्पादकांच्यामध्ये भीतीचे वातावरण पसरले आहे.
येथील सुरेश गणपती भामटेकर यांच्या गायीच्या शरीरावर गाठी, शरीरावरील ग्रंथीला पायाला, पोळीला सुज आली असून ताप, अशक्तपणा ही लक्षणे दिसत आहेत. याबाबत येथील पशुवैद्यकीय अधिकारी डॉ.शिंदे यांनी गायीची पाहणी करून उपचार केले. तालुक्यात जनावरावर हा लंपी आजार पहिल्यांदाच आल्याने पशुपालकांच्यामध्ये भीतीचे वातावरण पसरले आहे. हा आजार संसर्गजन्य प्रकारचा आहे.
याबाबत डॉक्टर शिंदे म्हणाले, “सलग सात दिवस बाधीत जनावरांच्यावर उपचार केल्यावर आजार संपुष्टात येतो. मात्र विषाणूजन्य आजार असल्याने इतर जनावरांनाही त्याचा धोका होऊ शकतो. “