नवीन आरग-बेडग उपसा सिंचन योजनेस मान्यता, ११०० हेक्टर क्षेत्राला मिळणार लाभ
प्रतिनिधी / मिरज
मिरज पूर्व भागातील आरग लक्ष्मीवाडी बेडग नरवाड या गावातील पाण्यापासून वंचित असणाऱ्या उंच टेकडीवरील ११०० हेक्टर क्षेत्राला नलिका वितरण प्रणाली द्वारे कायमस्वरूपी पाणी देण्याची योजना पाटबंधारे विभागाने आखली आहे. यासाठी जलसंपदा तथा पालकमंत्री जयंत पाटील यांनी विशेष प्रयत्न करून प्रस्तावास मान्यता दिली आहे. आता लवकर काम सुरू करण्याच्या सूचना अधिकाऱ्यांना दिलेल्या आहेत.
येथील गावांना जोडणारा हा भाग पठार या नावाने ओळखला जातो. म्हैसाळ उपसा सिंचन योजनेच्या मुख्य कालव्यापासून हा भाग उंचीवर आहे. उंच पातळीवरील अंदाजे ११०० हेक्टर क्षेत्र सिंचनापासून वंचित आहे. या क्षेत्राला पाणी देण्याची मागणी शेतकऱ्यांची होती. मोहनराव शिंदे कारखान्याचे चेअरमन मनोज शिंदे यांच्या नेतृत्वाखाली जयंत पाटील यांच्याकडे शिष्टमंडळाने मागणी केली होती. या मागणीला यश आले. याच मुळे या भागातील शेतकऱ्यांनी पेठे आणि साखर वाटून व फटाक्याची आतशबाजी करून आनंद उत्साह साजरा केला.