|Sunday, August 19, 2018
You are here: Home » आवृत्ती » मुंबई » फक्त आठ तालुक्यांतच दुष्काळ कसा ?

फक्त आठ तालुक्यांतच दुष्काळ कसा ? 

विखे-पाटील यांचे मुख्यमंत्र्यांना पत्र

मुंबई / प्रतिनिधी

राज्यातील अनेक जिल्हे भीषण दुष्काळाने होरपळून निघाले असताना सरकार फक्त आठ तालुक्यांतच दुष्काळ कसा जाहीर करते, असा प्रश्न उपस्थित करून हा प्रकार अत्यंत असंवेदनशील व शेतकऱयांप्रती अनास्था दाखविणारा असल्याची टीका विधानसभेचे विरोधी पक्षनेते राधाकृष्ण विखे-पाटील यांनी केली आहे. त्यांनी यासंदर्भात मुख्यमंत्र्यांना पत्र लिहिले असून, इतर दुष्काळी तालुक्यांमध्येही तातडीने दुष्काळ जाहीर करण्याची मागणी केली आहे.

राज्य सरकारने यवतमाळ जिह्यातील पाच, वाशीम जिह्यातील एक आणि जळगाव जिह्यातील दोन तालुक्यांमध्ये रब्बी हंगामासाठी मध्यम स्वरूपाचा दुष्काळ जाहीर केला. परंतु, हा निर्णय घेताना सरकारने राज्यातील अनेक तालुक्यांवर मोठा अन्याय केला आहे. या आठ तालुक्यांमध्ये मध्यम दुष्काळ जाहीर करताना सरकारने पर्जन्यमानातील तूट, खालावलेली भूजल पातळी, मफदू आर्दता आदी घटकांचा विचार केला आहे. राज्यातील इतरही अनेक तालुक्यांमध्ये हेच घटक लागू असून, त्याठिकाणी पाण्याची प्रचंड टंचाई आहे. शेतकऱयांना पाण्याच्या उपलब्धतेसाठी मोठय़ा प्रमाणात मनुष्यबळ व आर्थिक बळ खर्च करावे लागते आहे. पुढील काळात या तालुक्यांमध्येही भीषण परिस्थिती निर्माण होण्याची शक्यता आहे. परंतु, गेल्या रब्बी हंगामात पिके बरी झाली किंवा पेरणीखालील क्षेत्र तुलनेत अधिक आहे, या निकषांमुळे इतर तालुक्यांचा दुष्काळी तालुक्यांमध्ये समावेश होऊ न शकल्याची भावना अनेक तालुक्यांमधून व्यक्त होते आहे, असे विखे-पाटील यांनी पत्रात नमूद केले आहे.

राज्य सरकारने आजवर जाहीर केलेल्या दुष्काळी भागात दुष्काळी उपाययोजनांनी शंभर टक्के अंमलबजावणी केलेली नाही. दुष्काळग्रस्त भागांमध्ये लागू करावयाच्या सवलती जाहीर केल्या जातात. परंतु, त्याची योग्य अंमलबजावणी होत नाही. सर्वात महत्वाचे म्हणजे दुष्काळात दिले जाणारे निविष्टा अनुदान शेतकऱयांना दिले जात नाही. नागपूर खंडपीठाच्या आदेशान्वये खरीप 2015 मध्ये सरकारला विदर्भातील 11 हजार 862 गावांमध्ये जाहीर करावा लागलेला दुष्काळ आणि खरीप 2017 मध्ये जाहीर झालेल्या दुष्काळातील आर्थिक मदत शेतकऱयांना मिळालेली नसल्याच्या तक्रारी आहेत.

हिवाळी अधिवेशन 2017 च्या शेवटच्या दिवशी राज्य सरकारने विधानसभेत कापसावरील बोंडअळी आणि धानावरील मावा, तुडतुडय़ामुळे नुकसान झालेल्या शेतकऱयांना आर्थिक मदत जाहीर केली होती. परंतु, आजवर या मदतीचा प्रशासकीय आदेश काढण्यापलीकडे सरकारने काहीही केलेले नाही. अजूनही नुकसानग्रस्त शेतकऱयांना मदत मिळालेली नाही. या पार्श्वभूमीवर राज्य सरकारने दुष्काळ जाहीर करण्यासाठी लागू केलेले कठोर निकष शिथील करून गंभीर परिस्थिती असलेल्या तालुक्यांमध्येही तात्काळ दुष्काळ जाहीर करावा, यापूर्वी जाहीर केलेल्या दुष्काळामधील निविष्टा अनुदान शेतकऱयांना तातडीने देण्यात यावे आणि बोंडअळी, मावा व तुडतुडय़ामुळे नुकसान झालेल्या शेतकऱयांच्या बॅंक खात्यात सरकारच्या घोषणेप्रमाणे आर्थिक मदत तात्काळ जमा करण्यात यावी, अशी मागणी विखे -पाटील यांनी पत्राच्या माध्यमातून मांडली.

Related posts: