ऑनलाईन टीम / वॉशिंग्टन :
आफ्रिकन वंशाच्या कृष्णवर्णीय नागरिकाची पोलिसांकडून हत्या झाल्यानंतर अमेरिकेच्या 24 राज्यात हिंसक आंदोलने सुरू आहेत. हे आंदोलन रोखण्यासाठी अमेरिकेत 7 जूनपर्यंत संचारबंदी लागू करण्यात आली आहे.
मिनियापोलीस येथे मागील सोमवारी जॉर्ज फ्लॉईड या आफ्रिकन अमेरिकी व्यक्तीचा श्वेतवर्णीय पोलीस अधिकाऱ्याने गुडघा मानेवर दाबून घुसमटवल्याने मृत्यू झाला होता. त्यानंतर शुक्रवारपासून अमेरिकेत हिंसाचार उफाळला आहे.
फ्लॉईड यांच्या हत्येच्या निषेधार्थ अमेरिकेतील 24 राज्यात हिंसाचाराचा आगडोंब उसळला असून, जाळपोळ, लूटमार, सार्वजनिक मालमत्तेची तोडफोड असे प्रकार मोठ्या प्रमाणावर घडत आहेत. त्यासाठी 17 हजार सुरक्षा रक्षकही तैनात करण्यात आले आहेत. आंदोलकांना पांगवण्यासाठी पोलीस अश्रूधूर रसायने, रबरी गोळ्यांचा वापर करीत आहेत. आंदोलकांच्या गाड्यांच्या काचाही फोडण्यात आल्या.