एडुहेल्मला एफडीएचा हिरवा कंदील – लाखो लोकांच्या अपेक्षा बळावल्या
वृत्तसंस्था / वॉशिंग्टन
अमेरिकेतील औषध नियामक फूड अँड ड्रग ऍडमिनिस्ट्रेशनने (एफडीए) सोमवारी अल्जाइमर रोगावरील उपचारासाठी प्रायोगिक नवे औषध एडुहेल्मला सशर्त मंजुरी दिली आहे. अमेरिकेच्या नियामकांकडून मंजुरी मिळालेले हे या आजारावरील पहिले औषध ठरले आहे. सुमारे दोन दशकांनी या आजारासाठी पहिले नवे औषध आहे. बायोजेनकडून विकसित एडुल्हेम अल्जायमर रोगासाठी मान्यताप्राप्त पहिले आणि 2003 नंतर अल्जाइमरसाठी मंजुरी मिळालेला पहिला नवा उपचार आहे. हजारो लोकांना याचा लाभ होण्याची अपेक्षा आहे.
अल्जाइमर रोग पहिल्यांदा 115 वर्षांपूर्वी एका जर्मन मानसोपचारतज्ञाकडून ओळखण्यात आला होता. हा रोग एक अपरिवर्तनीय आणि वाढत जाणारा मेंदूविकार आहे. यामुळे स्मरणशक्ती आणि विचार करण्याची क्षमता नष्ट होते. तर अल्जायमर रोगाचे विशेष कारण पूर्णपणे ज्ञात नाही. एडुहेल्म अल्जाइमर रोगासाठी मान्यताप्राप्त पहिल्या उपचारपद्धतीचे प्रतिनिधित्व करते. बायोजन ही कॅम्ब्ा्रिज येथील एक बायोटेक्नॉलॉजी कंपनी आहे. कंपनीचा जपानी भागीदार ईसाईने हे औषध विकसित केले आहे.
3,482 रुग्णांचे प्रतिनिधित्व करणाऱया तीन विविध अध्ययनांमध्ये एडुहेल्मच्या प्रभावाच्या मूल्यांकनाच्या आधारावर ही मंजुरी देण्यात एफडीएकडून सांगण्यात आले आहे. एडुहेल्मला मंजुरी दिली जावी का यावर जाहीर चर्चा झाली असल्याचे विधान एफडीएफच्या सेंटर फॉर ड्रग इव्हॅल्युशनच्या संचालिका डॉ. पॅट्रिजिया कॅवाजोनी यांनी पेले आहे.
मंजुरीवरून वाद
एफडीएफच्या मंजुरीनंतर यावर काही वादही समोर येत आहेत. नोव्हेंबर महिन्यात एफडीएकडून नियुक्त पेरिफेरल आणि सेंट्रल नर्व्हस सिस्टीम ड्रग्स सल्लागार समितीच्या 11 सदस्यांपैकी 10 जणांनी सादर संशोधनाच्या आधारावर औषधाला मंजुरी देण्याच्या विरोधात मतदान केले होते.