प्रतिनिधी/ पर्वरी
बँकांमधील एटीएमसाठी रक्कम पुरविणाऱया वाहनाला आग लागून लाखो रुपयांची हानी झाली आहे. सुदैवाने वाहनात रोकड नसल्याने मोठी हानी टळली. ही घटना म्हापसाहून पर्वरीकडे येताना दामियान द गोवा पर्वरी येथे शुक्रवारी दुपारी 2.30 वा. घडली.
मिळालेल्या माहितीनुसार, काल शुक्रवारी 25 रोजी दुपारी 2.30 वा. सुमारास जीए 03 एन 8701 ही टाटा झेनीन वाहन म्हापसा येथील गॅरेजमध्ये दुरुस्तीसाठी नेण्यात आले होते. परंतु काही कारणास्तव वाहनाची दुरुस्ती झाली नाही. त्यामुळे परत पर्वरी येथे आणत असताना चालत्या वाहनाने पेट घेतला. वाहनचालकाने प्रसंगावधान राखून वाहन महामार्गाच्या बाजूने उभे करून बाहेर उडी घेतल्याने तो वाचला.
वाहन चालकाने आरडाओरड करून मदतीची याचना केली. तोपर्यंत पर्वरी पोलिस व आग्निशामक दलाला माहिती देण्यात आली. अग्निशामक बंब येईपर्यंत वाहन जळून खाक झाले. वाहन दुरुस्तीला नेल्याने आतील रक्कम काढून ठेवली होती. सुदेश रेडकर यांनी पंचनामा केला.