प्रतिनिधी/ बेळगाव
एक वर्षापूर्वी झालेल्या वादावादीच्या कारणावरून मारुतीनगर येथील एका तरुणावर शनिवारी चाकूहल्ला करण्यात आला आहे. सांबरा रोडवरील एका बारजवळ ही घटना घडली असून माळमारुती पोलिसात या घटनेची नोंद झाली आहे.
सर्वेश कंग्राळकर (वय 22, रा. तिसरा क्रॉस, मारुतीनगर) असे जखमी तरुणाचे नाव आहे. चाकूहल्ल्यात त्याच्या पाठीवर दुखापत झाली आहे. त्याच्यावर खासगी इस्पितळात उपचार करण्यात येत आहेत. माळमारुतीचे पोलीस निरीक्षक बी. आर. गड्डेकर पुढील तपास करीत आहेत.
पोलीस सूत्रांनी दिलेल्या माहितीनुसार, एक वर्षापूर्वी सर्वेश व शिंदोळी येथील लक्ष्मण दड्डी या दोघांमध्ये भांडण झाले होते. त्यावेळी पंचांसमक्ष समेट घडविण्यात आला होता. शनिवारी सांबरा रोडवरील राघव पॅलेस बारजवळ सर्वेश उभा होता. त्यावेळी लक्ष्मणने त्याच्याकडे डोळे वटारून पाहिले. याच कारणावरून दोघांमध्ये पुन्हा भांडण झाले. भांडणानंतर सर्वेशवर चाकूहल्ला करण्यात आला आहे.