औरंगाबाद / प्रतिनिधी :
सिमेंट कंपनीच्या गोदामात भिंतीलगत थांबलेला अभियंता ट्रकखाली दबून मृत्यूमुखी पडल्याची घटना बीड बायपास परिसरातील देवळाई रोडवर गुरुवारी घडली.
गणेश तात्याराव ढोले (32, रा. जयभवानीनगर) असे मृत अभियंत्याचे नाव आहे. पोलिसांनी सांगितले की, बीड बायपास परिसरातील देवळाई रस्त्यावर वंडर सिमेंट कंपनीचे गोदाम आहे. कंपनीचे तांत्रिक सहायक गणेश ढोले हे सकाळी 10 वाजताच तेथे उपस्थित होते. यावेळी एक चालक सिमेंट नेण्यासाठी ट्रक घेऊन आला होता. गोदामातील सिमेंट गोण्या पाहत असताना चालकाने अचानक वेगात ट्रक मागे घेतला. तेथे उभ्या असलेल्या मजुरांनी आरडाओरड करून ट्रक थांबविण्याचे सांगितले. मात्र, चालकाच्या लक्षात येण्याअगोदरच ट्रक गणेश यांच्या अंगावर गेला. यात त्यांचा चेंदामेंदा झाल्याने ते घटनास्थळीच गतप्राण झाले. चालकाला सुनावल्यानंतर त्याने ट्रक पुढे घेतला. त्यानंतर गंभीर जखमी गणेशला बाहेर काढून वाहनातून घाटी रुग्णायात दाखल करण्यात आले. अपघात विभागातील डॉक्टरांनी तपासून मृत घोषित केले. पोलिसांनी ट्रक जप्त केल्याची माहिती पोलीस निरीक्षक विठ्ठल पोटे यांनी दिली.