नवी दिल्ली / वृत्तसंस्था
‘चलो बुलावा आया है’ या लोकप्रिय गीताचे गायक आणि भजन सम्राट नरेंद्र चंचल यांचे शुक्रवारी दिल्लीतील अपोलो रुग्णालयात निधन झाले. ते 80 वर्षांचे होते. अशक्तपणा आणि वृद्धापकालीन आजारांमुळे त्यांच्यावर अपोलो रुग्णालयात उपचार सुरू होते. गायक दलेर मेहेंदी यांनी सोशल मीडिया पोस्टद्वारे त्यांच्या निधनाच्या वृत्ताला दुजोरा दिला आहे. पंतप्रधान नरेंद्र मोदी यांच्यासह कलाविश्वातील अनेक दिग्गजांनी त्यांच्या निधनावर दुःख व्यक्त केले आहे.
अमृतसरच्या नमक हांडी येथे 16 ऑक्टोबर 1940 साली जन्मलेल्या नरेंद्र चंचल यांना अनेक संघर्षानंतर बॉलिवूडमध्ये काम मिळाले होते. बॉबी, बेनाम, रोटी कपडा और मकान या चित्रपटांसाठीही त्यांनी गाणी गायली होती. त्यांनी गायलेले ‘बॉबी’ चित्रपटातील ‘बेशक मंदिर मस्जिद तोडो’ हे गाणे प्रचंड लोकप्रिय झाले होते. या गाण्यासाठी त्यांना फिल्मफेअर बेस्ट मेल प्लेबॅक पुरस्कार मिळाला होता. ‘अवतार’ या चित्रपटातील ‘चलो बुलावा आया है’ या गाण्याने त्यांचे नाव अजरामर झाले होते. काही दिवसांपूर्वी त्यांनी कोरोना संसर्गावर गायलेले गाणे सोशल मीडियावर बरेच व्हायरल झाले होते.