आपुलकीच्या सेवेबद्दल मानले आभार
बेळगाव / प्रतिनिधी
महाराष्ट्र एकीकरण समितीने लोकसहभागातून सुरू केलेले कोविड आयसोलेशन सेंटरमधून पहिले दाम्पत्य शनिवारी कोरोनामुक्त झाले. आयसोलेशन सेंटरमध्ये मिळालेली उत्तम सेवा, करण्यात आलेला औषधोपचार यामुळे हे दाम्पत्य भावनाविवश झाले. यापुढेही रुग्णांना अशीच आपुलकीची सेवा द्या, असा आशिर्वाद त्या दाम्पत्याने दिला.
कोरोना झाल्यामुळे शामराव व आशा देसाई यांना म. ए. समितीच्या मराठा मंदिर येथील आयसोलेशन सेंटरमध्ये दाखल करण्यात आले होते. त्यांच्यावर काही दिवस उपचार करण्यात आले. उत्तम सेवा मिळाल्याने हे दोघेही अवघ्या पाच दिवसांमध्ये कोरोनामुक्त होवून बाहेर पडले. शनिवारी सेंटरमधून बाहेर पडल्यानंतर त्यांच्यावर फुलांचा वर्षाव करण्यात आला.
शामराव देसाई म्हणाले, कोरोना झाल्यामुळे घाबरलो होतो. परंतु म. ए. समितीच्या आयसोलेशन सेंटरमध्ये आल्यानंतर ही भीती कमी झाली. येथील नर्स तसेच डॉक्टर यांनी खूप चांगली सेवा दिली. वेळेवर नाष्टा, जेवण, चहा यांची व्यवस्था केल्यामुळेच आम्ही लवकर बरे होवू शकलो. त्यामुळे मी म. ए. समितीचे तसेच त्यांच्या कार्यकर्त्यांचे आभार मानतो असे त्यांनी सांगितले.
यावेळी म. ए. युवा समितीचे अध्यक्ष शुभम शेळके, मदन बामणे, अंकुश केसरकर, बाळू जोशी, सुरज कुडूचकर, सचिन केळवेकर, राजू कदम, अनिल सांबरेकर, इंद्रजित धामणेकर यांच्या इतर कार्यकर्ते उपस्थित होते.