प्रतिनिधी / विटा
विहरीत पोहण्यासाठी गेलेल्या युवकाचा पाण्यात बुडून मृत्यू झाला. विवेक भीमराव चौगुले (२१, रा. हनुमान मंदिरजवळ, विटा) असे मयत तरूणाचे नाव आहे. ही घटना शुक्रवार २६ मार्च रोजी सकाळी ८.३० वाजण्याच्या सुमारास येथील हराळे मळा येथे घडली. या प्रकरणी अनिल हराळे यांनी फिर्याद दिली आहे, अशी माहिती पोलिसांनी दिली.
याबाबत पोलिसांतून मिळालेली माहिती अशी, येथील विवेक भीमराव चौगुले शुक्रवार २६ मार्च रोजी सकाळी ८.३० वाजण्याच्या सुमारास येथील हराळे मळा येथील विहरीत पोहण्यासाठी मित्रांसोबत गेला होता. याच दरम्यान त्याचा पाण्यात बुडून मृत्यू झाला. याबाबत माहिती मिळताच अनिल हराळे यांनी पोलिसांना कळविले. पोलिसांनी घटनास्थळी दाखल होत विवेकचा मृतदेह स्थानिकांच्या मदतीने बाहेर काढला. या घटनेने चौगुले कुटुंबियांना मात्र चांगलाच धक्का बसला आहे.
दरम्यान, विवेक हा होतकरू आणि हुशार युवक होता. त्याचे वडील खासगी वाहनावर चालक म्हणून काम करतात. विवेक संगणक क्षेत्रात पारंगत होता. हातातोंडाशी आलेला मुलगा गेल्याने चौगुले कुटुंबाला धक्का बसला. त्याच्या पश्चात आई वडील, बहीण असा परिवार आहे. घटनेची पोलिसात नोंद करण्यात आली आहे.