प्रतिनिधी / सांगली
सांगली शहरातील जुन्या बुधगाव रोडवरील पंचशीलनगरमधील रेल्वे लाईनच्या बाजूला असणाऱ्या चार झोपड्या शार्ट सर्किटने जळून खाक झाल्या आहेत. या झोपड्यामधील सिलिंडर बाहेर काढत असताना एका सिलिंडरचा स्फोट होवून महापालिकेचा अग्निशमन विभागाचा कर्मचारी रामचंद्र चव्हाण हा २५ टक्के भाजला आहे. तर त्याच्याबरोबर इतर तीन कर्मचाऱ्यांनाही आग आटोक्यात आणताना भाजले आहे. या झोपडपट्टीतील सर्व संसार साहित्य जळून खाक झाले असून लाखो रूपयांचे नुकसान झाले आहे.
याबाबत माहिती अशी की, पंचशीलनगर येथील रेल्वे लाईनच्या बाजूला पत्रा चाळ बजा झोपडपट्टी आहे. या झोपडपट्टीमधील सर्व घरे दुपारी बंद होती. याच दरम्यान शार्टसर्किटने आग लागली. याची माहिती अग्निशमन विभागाला तात्काळ देण्यात आली. दरम्यान आगीचे बब येईपर्यंत आगीने चांगलाच पेट घेतला महापालिकेच्या कर्मचाऱ्यांनी आग आटोक्यात आणत असतानाच आतमध्ये शिरून याठिकाणी असणारे सात सिलिंडर बाहेर काढले आणि आठवा सिलिंडर बाहेर काढत असतानाच त्याचा स्फोट झाला त्यामुळे महापालिकेचे कर्मचारी रामचंद्र चव्हाण हे २५ टक्के भाजले आहेत. ही आग आटोक्यात आली असून या चार घरांचे मिळून लाखांचे नुकसान झाले आहे.