पोलीस रस्त्यावर, मात्र आमदार खाडेंच्या मध्यस्तीनंतर हायस्कुल रोडवरील दुकाने उघडली
प्रतिनिधी / मिरज
प्रशासनाने परवानगी नाकारल्यास मिरज शहरातील सर्व व्यापारी दुकाने उघडतील असा इशारा भाजपने दिला होता. शुक्रवारी आमदार सुरेश खाडे, खासदार संजय पाटील यांच्या नेतृत्वाखाली व्यापाऱ्यांची रॅली काढून दुकाने उघडण्यात आली. मात्र, काही वेळातच पोलिसांकडून कारवाई सुरू झाल्याने उघडलेल्या दुकानांचे पुन्हा शटर डाऊन झाले.
पोलीस निरीक्षक राजू ताशीलदार यांनी व्यापाऱ्यांना आवाहन करून दुकाने बंद करण्यास सांगितले. मात्र, आमदार सुरेश खाडे यांनी मध्यस्ती घेऊन व्यापाऱ्यांची बाजू मांडली. त्यानंतर हायस्कुल रोडवरील काही दुकाने उघडण्यात आली. एकीकडे लोकप्रतिनिधींच्या आवाहनाला प्रतिसाद देऊन व्यापाऱ्यांनी दुकाने उघडली. मात्र, दुसरीकडे प्रशासनाकडून व्यापाऱ्यांवर कारवाई केली जात असल्याने वादवादीचे प्रकार घडले.