सामाजिक कार्यकर्ते शरद फडके यांची मागणी
सांगली/प्रतिनिधी
हरिपूर रस्त्यावर लोखंडी पूल नावाने ओळखला जाणारा पूल आहे. साधारण १० वर्षापूर्वी याचे रुंदीकरण करण्यात आले. रुंदीकरण करताना पुलाच्या कडेच्या साईड पट्या अशाच रिकाम्या ठेवण्यात आल्या आहेत. त्या आता धोकादायक होऊ लागल्या आहेत. या लोखंडी पुलाला रेलिंग लावण्यात यावेत, अशी मागणी सामाजिक कार्यकर्ते शरद फडके यांनी केली आहे.
या पुलाच्या २० फुटाखाली ओढा वाहत असून, जर साईड पट्टी वरून एखादा माणूस, जनावर अनावधाने घसरले तर सरळ त्या ओढ्यात पडेल. तेथेच झालेले नवीन सिमेंटचे गटार, झाडेझुडपे याला अडकून दुर्घटना घडण्याचीही दाट शक्यता आहे. तरी संबंधित नगरपालिकेचे अधिकारी, नगरसेवक यांनी याची पहाणी करून या ठिकाणी लोखंडी रेलिंग किवा पाच फुटी भिंत बांधून या साईड पट्टीचा भाग सुरक्षित करावा, अशी विनंती फडके यांनी केली आहे.