वृत्तसंस्था/ नवी दिल्ली
देशामध्ये होणाऱया विविध वयोगटातील राष्ट्रीय विभागीय टेबल टेनिस स्पर्धांमधील पुरूष आणि महिला विजेत्या टेबल टेनिसपटूंना यापुढे समान बक्षिसांची रक्कम दिली जणार आहे. अखिल भारतीय टेबल टेनिस फेडरेशनच्या प्रशासकीय कार्यकारी समितीच्या बैठकीमध्ये हा निर्णय घेण्यात आला आहे.
भारतामध्ये विविध वयोगटातील राष्ट्रीय आणि विभागीय टेबल टेनिस स्पर्धा आयोजित केल्या जातात. या स्पर्धेमध्ये विजेत्यांसाठी रोख रक्कमेची बक्षिसे दिली जातात. यापूर्वी पुरूष आणि महिलांच्या विभागातील विजेत्यांच्या बक्षिसामध्ये फरक जाणवत होता. यापुढे अशा स्पर्धांमध्ये पुरूष आणि महिला यांना समान हक्क मिळावे या दृष्टीकोनातून फेडरेशनने बक्षीस रक्कम समान ठेवण्याचा निर्णय घेतला आहे. 2022 च्या टेबल टेनिस हंगामातील झालेल्या विविध वरिष्ठांच्या राष्ट्रीय स्पर्धांमध्ये एकेरीतील विजेत्यांना पुरूष विभागात 2.75 लाख रूपये तर महिलांच्या विभागात 1.80 लाख रूपयांची बक्षिसे देण्यात आली होती. अलिकडे 83 वी वरिष्ठांची राष्ट्रीय टेबल टेनिस स्पर्धा शिलाँगमध्ये झाली. या स्पर्धेनंतर फेडरेशनने वरील निर्णय घेतला आहे.