गुढीपाडव्यानिमित्त आंबिल गाडय़ांच्या मिरवणुकांचे आयोजन : कोरोनामुळे बहुतांश यात्रा साध्या पद्धतीने
वार्ताहर / किणये
तालुक्मयाच्या विविध गावांमध्ये पाडव्याच्या सणानिमित्त आयोजित करण्यात आलेल्या यात्रा उत्साहात झाल्या. कोरोनामुळे बहुतांश यात्रांचे आयोजन साध्या पद्धतीने करण्यात आले होते. पाडव्याच्या मुहूर्तावर अनेक गावातील मंदिरांमध्ये पूजाअर्चा करण्यात आली. मंदिरांना विद्युतरोषणाई करण्यात आली होती. भाविक मंदिरांमध्ये जाऊन दर्शनाचा लाभ घेताना दिसत होते.
ग्रामीण भागात पाडव्याचा सण वेगवेगळय़ा पद्धतीने साजरा करण्याची परंपरा आहे. या सणात विशेषतः बैलगाडे सजवून बैलांसह आंबिल गाडय़ांच्या मिरवणुका काढण्याची पद्धत आहे. ही पद्धत यंदाही जोपासण्यात आली. पाडव्याच्या मुहूर्तावर ग्रामीण भागातील नागरिकांनीही सोने-चांदी, कपडे, वाहने व गृहोपयोगी वस्तूंची खरेदी केली.
बैलजोडय़ांचे आरती ओवाळून स्वागत
दोन दिवस काही गावांमध्ये यात्रा झाल्या. यामध्ये बस्तवाड-हलगा गावातील कलमेश्वर यात्रेला मंगळवारी प्रारंभ झाला. पाडव्याच्या दिवशी सायंकाळी गावात आंबिल गाडय़ांची मिरवणूक काढण्यात आली. तसेच बुधवारी सकाळी ग्रामस्थांनी इंगळय़ांसाठी लाकडे आणून ठेवली. त्यानंतर बैलजोडय़ा सजवून गावात मिरवणूक काढण्यात आली. या बैलजोडींचे महिला आरती ओवाळून स्वागत करीत होत्या. सायंकाळी सातच्या दरम्यान ‘हर हर महादेव’च्या गजरात इंगळय़ांचा कार्यक्रम पार पडला.
इंगळय़ांमध्ये भाग घेण्यासाठी भक्त दिवसभर उपवास करतात. बस्तवाड येथील कलमेश्वर मंदिराजवळ पुजारी व हक्कदार यांनी इंगळय़ांचे पूजन केले. त्यानंतर पारंपरिक वाद्यांचा गजर झाला अन् ‘हर हर महादेव’च्या गजरात भक्त इंगळय़ांमधून धावताना दिसत होते.
राजहंसगडावर पारंपरिक पद्धतीने
गुढीपाडवा साजरा
ऐतिहासिक राजहंसगडावर गुढीपाडवा पारंपरिक पद्धतीने साजरा करण्यात आला.
गुढीपाडव्यानिमित्त परिसरातील भाविकांनी सिद्धेश्वराचे दर्शन घेतले. मंगळवारी पहाटेपासूनच सिद्धेश्वर मंदिर परिसरात भाविकांची गर्दी जमू लागली. प्रारंभी अभिषेक कार्यक्रम झाला. त्यानंतर पालखी सोहळा झाला. राजहंसगडावरील सिद्धेश्वर मंदिराभोवती सजविलेल्या बैलजोडय़ांनी प्रदक्षिणा घातली.
परंपरेनुसार श्रीफळ उडविण्याचा कार्यक्रम झाला. मंदिरात तुलाभार, नामकरण असे विविध कार्यक्रम झाले. राजहंसगड, सुळगे (येळ्ळूर), देसूर, येळ्ळूर, नंदिहळ्ळी, नागेनहट्टी व बेळगाव शहरातील भाविकांनी या यात्रेला गर्दी केली होती.
राजहंसगड परिसर निसर्गरम्य असा असल्यामुळे या किल्ल्यावर नेहमी गारवा जाणवतो. त्यामुळे पर्यटकांचीही या किल्ल्यावर नेहमी वर्दळ असते. दरवषी गुढीपाडव्याच्या दिवशी या भागात पावसाची हजेरी असतेच. यावर्षीही सायंकाळच्या दरम्यान रिमझिम पाऊस
बरसला.
बहाद्दरवाडी गावात गुढीपाडवा उत्साहात साजरा करण्यात आला. मंगळवारी गावातील ब्रम्हलिंग मंदिरातील ब्रम्हलिंग पिंडीची विधिवत पूजाअर्चा करण्यात आली. त्यानंतर दिवसभर भाविकांनी दर्शनाचा लाभ घेतला. बहाद्दरवाडीसह परिसरातील भक्त दर्शनासाठी येत होते. कोरोना असल्यामुळे प्रशासनाच्या नियमांचे पालन करण्यात आले.
ब्रम्हलिंग मंदिरात तुलाभार
ब्रम्हलिंग मंदिरात तुलाभार कार्यक्रम झाला. काही भक्तांनी मंदिरात पाच-पाच श्रीफळ ठेवून ‘प्याड’ बांधले होते. यानंतर सायंकाळी सर्व नारळ फोडून भक्तांना त्याचे वाटप करण्यात आले. मंदिरात रात्री उशिरापर्यंत भजनाचा कार्यक्रम झाला.
गावात ब्रम्हलिंग मंदिराचा जीर्णोद्धार केला असून मंदिराचा दुसरा वर्धापन सोहळा बुधवारी साजरा केला. यानिमित्त अभिषेक व महाआरती झाली. सायंकाळी तीर्थप्रसादाचे वाटप केले.