आयएमएफ एमडी जॉर्जिव्हा यांचे गौरवोद्गार ः जागतिक विकासात 15 टक्के योगदान देणार
वृत्तसंस्था / वॉशिंग्टन
आंतरराष्ट्रीय नाणेनिधीच्या (आयएमएफ) व्यवस्थापकीय संचालिका क्रिस्टलीना जॉर्जिव्हा यांनी भारत जागतिक अर्थव्यवस्थेत एक ब्राइट स्पॉट (उज्ज्वल स्थान) म्हणून कायम असल्याचे उद्गार बुधवारी काढले. 2023 च्या जागतिक विकासात भारत 15 टक्के योगदान देणार आहे. जागतिक विकासात उदयोन्मुख बाजारपेठ आणि विकसनशील अर्थव्यवस्थांची हिस्सेदारी सुमारे 80 टक्क्यांवर पोहोचविण्याची अपेक्षा आहे. डिजिटलायझेशनने जगातील पाचव्या क्रमांकाच्या अर्थव्यवस्थेला महामारीच्या प्रभावातून बाहेर काढल्याचे त्या म्हणाल्या.
भारताची कामगिरी अत्यंत प्रभावी राहिली आहे. मार्चमध्ये समाप्त होणाऱया आर्थिक वर्षात भारत 6.8 टक्के विकासदर राखणार असल्याची अपेक्षा आम्ही करतो. 2023-24 आर्थिक वर्षासाठी आम्ही 6.1 टक्के विकासदराचा अनुमान व्यक्त करत आहोत. जगातील अन्य अर्थव्यवस्थांप्रमाणे हा काहीसा मंद असला तरीही जागतिक सरासरीपेक्षा खूपच अधिक आहे. प्रमुख अर्थव्यवस्थांमध्ये हा विकासदर सर्वाधिक ठरणार असल्याचे जॉर्जिव्हा यांनी वृत्तसंस्थेला दिलेल्या मुलाखतीत म्हटले आहे.
भारत ब्राइट स्पॉट का?
आयएमएफने 2023 मध्ये जागतिक विकासदर मागील वर्षाच्या 3.4 टक्क्यांवरून कमी करत 2.9 टक्क्यांवर आणला असताना भारत ब्राइट स्पॉट म्हणून कायम असून याकरता तीन कारणे असल्याचे जॉर्जिव्हा यांनी नमूद केले आहे. महामारीच्या प्रभावावर नियंत्रण मिळविणे आणि विकास तसेच रोजगाराच्या संधी निर्माण करण्यासाठी भारताने डिजिटलायझेशनवर काम केले आहे. भारताचे राजकोषीय धोरण हे आर्थिक स्थितींबद्दल प्रतिसादात्मक राहिले असून नव्या अर्थसंकल्पातूनही चांगले संकेत मिळाले आहेत. भारताने महामारीच्या कठीण काळातून बाहेर पडण्यासाठी अत्यंत ठोस धोरणे लागू करण्यास टाळाटाळ केली नसल्याचे जॉर्जिव्हा यांनी स्पष्ट केले आहे.
ग्रीन अर्थव्यवस्थेवर लक्ष केंद्रीत
भारत ग्रीन इकोनॉमीमध्ये गुंतवणुकीवर अधिक लक्ष देत असल्याचे माझ्या निदर्शनास आले आहे. भारत आता स्वच्छ ऊर्जेच्या दिशेने वाटचाल करत विकासाचे चक्र सुरू ठेवण्याची क्षमता बाळगून आहे. भारताने डिजिटल आयडीप्रकरणी अत्यंत साहसी पाऊल उचलले आहे. जी-20 अध्यक्षत्व भारताला त्याचा डिजिटलायझेशन अनुभव उत्तम प्रकारे विकसनशील देशांसमोर मांडण्याची संधी प्रदान करणार असल्याचे त्या म्हणाल्या.
पाकिस्तानला सहाय करण्याची इच्छा
आयएमएफ पाकिस्तानला सहकार्य करू इच्छितो. परंतु आम्ही तेथे करसंकलन करत त्याचे योग्य वितरण केले जावे असे इच्छितो. सार्वजनिक निधीचा वापर चांगल्याप्रकारे करत समाजातील दुर्बलांपर्यंत तो पोहोचणे आवश्यक आहे. दुसऱया शब्दांत सांगायचे झाल्यास गरज नसलेल्या लोकांना अनुदान मिळू नये असे जॉर्जिव्हा यांनी पाकिस्तानसंबंधी बोलताना सांगितले आहे.
घोषवाक्य प्रेरणादायी
भारताने जी-20 परिषदेसाठी निवडलेले घोषवाक्य ‘एक पृथ्वी, एक परिवार, एक भविष्य’ अत्यंत प्रेरणादायी आहे. भारताने स्वतःच्या अध्यक्षत्वासाठी एक महान आदर्श वाक्य निवडले असल्याचे जॉर्जिव्हा यांनी नमूद केले आहे. जॉर्जिव्हा या बेंगळूरमध्ये आयोजित होणाऱया जी-20 च्या वित्तीय बैठकीत भाग घेणार आहेत.