वृत्तसंस्था/ श्रीनगर
नॅशनल कॉन्फरन्सचे (एनसी) उपाध्यक्ष ओमर अब्दुल्ला यांनी शुक्रवारी लोकसभा निवडणुकीसाठी पीपल्स डेमोक्रॅटिक पार्टीसोबत (पीडीपी) जागावाटप बोलणी करण्यास असहमती दर्शवली. पत्रकार परिषदेत बोलताना ओमर यांनी जागावाटपासाठी पीडीपीशी तडजोड करणार नसल्याचे सांगितले. नॅशनल कॉन्फरन्स काश्मीर खोऱ्यातील लोकसभेच्या तीनही जागा स्वतंत्रपणे लढवेल आणि स्वबळावर जिंकेल, असा दावाही ओमर अब्दुल्ला यांनी केला.
नॅशनल कॉन्फरन्सला पीडीपीसोबत भागीदारी करावी लागेल असे त्यांना आधी सांगितले असते तर आपला पक्ष ‘इंडिया’ आघाडीत सामील झाला नसता, असेही ओमर अब्दुल्ला म्हणाले. तसेच राहुल गांधी आणि सोनिया गांधी यांनी काँग्रेससाठी जागा सोडा असे म्हटले तर ती जागा पीडीपीऐवजी काँग्रेसला देण्यास प्राधान्य देऊ, असेही त्यांनी स्पष्ट केले.