वृत्तसंस्था /डब्लीन (आयर्लंड)
येथे सुरू असलेल्या 23 वर्षांखालील वयोगटाच्या युनिफर पंचरंगी महिला हॉकी स्पर्धेत भारतीय कनिष्ठ महिला हॉकी संघाने आपली घोडदौड कायम राखताना बुधवारी झालेल्या सामन्यात युक्रेनचा 3-0 अशा गोलफरकाने एकतर्फी पराभव केला.
या सामन्यात भारतातर्फे निकिता टोप्पोने 33 व्या मिनिटाला, मंजू चौरासियाने 44 व्या तर ब्युटी डुंगडुंगने 55 व्या मिनिटाला गोल केले. युक्रेनच्या महिला संघाने सुरूवातीपासूनच आक्रमक आणि वेगवान खेळावर भर देताना पाचव्या मिनिटाला पहिला पेनल्टी कॉर्नर मिळविला पण भारतीय गोलरक्षकाच्या शानदार कामगिरीमुळे युक्रेनचा हा पेनल्टी कॉर्नर वाया गेला. भारतीय संघाला स्थिर होण्यासाठी काही कालावधीची वाट पाहावी लागली. भारताने पाठोपाठ दोन पेनल्टी कार्नर मिळविले पण त्यांना त्याचा लाभ घेता आला नाही. सामन्यातील पहिल्या 15 मिनिटांच्या कालावधीत दोन्ही संघांना खाते उघडता आले नाही. भारताने दुसऱया 15 मिनिटांच्या कालावधीत युक्रेनच्या बचावफळीवर चांगलेच दडपण आणले. या कालावधीत भारताला एक पेनल्टी कॉर्नर मिळाला पण तो वाया गेला. मध्यंतरापर्यंत गोलफलक कोराच होता.
सामन्यातील 33 व्या मिनिटाला निकिता टोप्पोने मैदानी गोल नोंदवून भारताचे खाते उघडले. त्यानंतर युक्रेनला पेनल्टी कॉर्नर मिळाला पण तो वाया गेला. 44 व्या मिनिटाला मंजू चौरासियाने मैदानी गोल नोंदवून भारताची आघाडी 2-0 अशी वाढविली.