महागाई भत्त्यावर निर्णय शक्य – मंत्रिमंडळ विस्ताराचीही चर्चा
नवी दिल्ली / वृत्तसंस्था
उद्या बुधवारी सकाळी 11 वाजता पंतप्रधान नरेंद्र मोदी यांच्या अध्यक्षतेखाली केंद्रीय मंत्रिमंडळाची बैठक होणार असून या बैठकीत महागाई भत्त्यासंबंधी निर्णय, केंद्रीय मंत्रिमंडळाच्या विस्तारावर विचारमंथन, तसेच कोरोना नियंत्रण आणि लसीकरणाची स्थिती, यांवर चर्चा होणार असल्याची माहिती सूत्रांनी दिली.
26 जूनला जेसीएमची बैठक झाली होती. या बैठकीत सातव्या वेतन आयोगाच्या सूचनांनुसार केंद्र सरकारी कर्मचाऱयांना महागाई भत्त्याची थकबाकी देण्यासंबंधीच्या मुद्दय़ावर निर्णय घेण्यात आला होता. कोरोना उद्रेकामुळे या कर्मचाऱयांना महागाई भत्त्याचे तीन हप्ते देण्यात आलेले नाहीत. थकबाकी आणि हे तीन हप्ते येत्या सप्टेंबरपर्यंत देण्याचा निर्णय मंत्रिमंडळाच्या बैठकीत होऊ शकतो.
कर्मचाऱयांना तिन्ही हप्ते आणि थकबाकी देण्याचा निर्णय झाल्यास सरकारच्या तिजोरीवर मोठा ताण पडणार आहे. केंद्रीय कर्मचाऱयांची एकंदर संख्या 52 लाखांहून अधिक असून पेन्शनरांची संख्या 60 लाखांहून अधिक आहे. त्यांना जानेवारी 2020, जुलै 2020 आणि जानेवारी 2021 असे महागाई भत्त्याचे तीन हप्ते दिले गेलेले नाहीत, अशी महिती सूत्रांकडून देण्यात आली.
लसीकरणाचा आढावा
या बैठकीत देशव्यापी लसीकरणाचा आढावा घेण्यात येण्याची शक्यता आहे. आतापर्यंत देशातील 35 कोटी नागरिकांना कोरोना लसीचा किमान एक डोस देण्यात आला आहे. तर सहा कोटी लोकांना दोन्ही डोस देण्यात आलेले आहेत. डिसेंबर अखेरपर्यंत 80 कोटी नागरिकांना लस देण्याचे ध्येय आहे.