संकट कोरोनाचे किट वापराच्या आहेत गाईड लाईन्स
‘हाय रिस्क’ आणि ‘व्हायरल लोड’ जास्त तेथेच वापर आवश्यक
संस्थात्मक विलगीकरण कक्षात मास्क आणि ग्लोव्हज पुरेसे
किट घालताना व काढतानाची पद्धत वेगळी स्थानिक जनतेने वापर टाळावा
आजही पीपीई किटची कमतरता उगाच मागणीने तुटवडा नको
पीपीई किट वापराच्याही गाईड लाईन्स आहेत. सध्या संस्थात्मक विलगीकरणासाठी पीपीई किटची मागणी अनाठायी आहे. अशाचप्रकारे पीपीई किटचा वापर करू लागलो, तर काही दिवसांनी कणकवली बाजारात पण पीपीई किट घालून लोक फिरताना दिसतील.
पीपीई किटचा वापर ‘हाय रिस्क’ आणि ‘व्हायरल लोड’ जास्त आहे, तिथेच करायचा असतो. संस्थात्मक विलगीकरण कक्षात फक्त मास्क आणि ग्लोव्हज असले तरी चालतात. तसेच पीपीई किट disposable असतात. म्हणजे यूज अँड थ्रो. एकदा वापरा आणि फेकून द्या. तसेच ती घालताना आणि परत काढतानाची पण पद्धत वेगळी असते. त्या पद्धतीने ती घालावी अथवा काढावी लागतात. त्यामुळे स्थानिक जनतेने अशाप्रकारचा वापर टाळावा.
आजही आपल्याकडे अशा पीपीई किटची कमतरता आहे. त्यामुळे कोविड हॉस्पिटलमध्ये आज तुटवडा भासतोय. त्यामुळे ती गरज नसताना आपल्याकडे ठेवण्याऐवजी ती अशा कोविड हॉस्पिटलला द्या. संस्थात्मक विलगीकरण कक्षाशी संपर्कात येणारे कर्मचारी, पदाधिकारी यांनी फक्त ‘ट्रिपल लेअर मेडिकल मास्क’ आणि ग्लोव्हजचा वापर करा. हात स्वच्छ धुणे, हँड सॅनिटायझरचा वापर करणे, या गोष्टी पुरेशा आहेत.
पीपीई किटची कमतरता वैद्यकीय क्षेत्राला जाणवत असल्याने त्याची उगाच मागणी करून अजून तुटवडा भासू देऊ नका. साधारणपणे या पीपीई किटमधील कोणत्या गोष्टी, कोणी, कधी वापरायच्या यासाठी पण आरोग्य खात्याच्या मार्गदर्शक सूची आहेत. त्यानुसारच त्याचा वापर करायचा आहे. यासाठी तीन वेगवेगळय़ा गटांमधे त्याची विभागणी केली आहे.
कमी धोका (लो रिस्क), मध्यम धोका (मेडियम रिस्क) व उच्च धोका (हाय रिस्क). कमी धोका असणाऱयांनी फक्त ‘ट्रिपल लेअर मास्क’चा वापर करणे. मध्यम धोका असणाऱयांनी ‘एन-95 मास्क’, ग्लोव्हज आणि आवश्यकतेनुसार फेस शील्डचा वापर करणे. उच्च धोका असणाऱयांनी फक्त संपूर्ण पीपीई किटचा वापर करायचा आहे. आता या गटामध्ये कोण-कोण येतात ते पाहुया. कमी धोका : विमानतळ, पोर्ट येथील प्रवेश कक्ष, आरोग्य तपासणी कक्ष, तापमान मोजणी कक्ष, इतर प्रशासकीय अधिकारी, हॉस्पिटलमधे येणारे नातेवाईक, मृतदेह वाहणाऱया व्यक्ती, रोग्यांची काळजी घेणारे नातेवाईक, रुग्णवाहिका चालक, त्याला मदत करणारे मदतनीस, आशा-अंगणवाडी अशाप्रकारे घरोघरी सर्व्हे करणारे आरोग्य कर्मचारी, संस्थात्मक विलगीकरण कक्षातील लोक, तिथे काम करणारा कर्मचारी वर्ग, मदतनीस, घरी विलगीकरण केलेले रुग्ण, लोक, संबंधित नातेवाईक हे कमी धोकादायकमध्ये मोडतात. यांच्यासाठी फक्त ट्रिपल लेअर मेडिकल मास्क आणि साफसफाई करताना ग्लोव्हजचा वापर पुरेसा आहे.
आता मध्यम धोकामध्ये कोण-कोण येतात ते बघू. विमानतळ, पोर्ट येथील विलगीकरण कक्षात काम करणारे डॉक्टर, नर्सेस, सफाई कामगार, हॉस्पिटलमधील रजिस्टेशन टेबल, तापमान मोजणी कक्ष, तपासणी कक्षातील डॉक्टर, नर्सेस, सफाई कामगार, आंतर विभागातील विलगीकरण कक्ष, तेथील सफाई कामगार, सर्व इमर्जन्सी रुग्ण, व्हेंटिलेटरवर नसलेले रुग्ण ट्रान्स्फर करणारे कर्मचारी, मृतदेह हाताळणारे, सफाई आणि लाँड्री कामगार, सर्व्हे करणारे डॉक्टर अथवा नर्सेस जर रुग्ण तपासणी करीत असल्यास.
विलगीकरण कक्षातील लोकांची त्यांना लक्षणे असताना तपासणी करणारे डॉक्टर आणि नर्सेस यांनी फक्त ‘एन-95’ मास्क, ग्लोव्हज, आवश्यकतेनुसार फेस शील्डचा वापर करायचा आहे.
उच्च धोका : संपूर्ण पीपीई किटचा वापर या गटातील लोकांसाठी करावा. यामधे श्वसनाचा आजार असलेल्या अतीगंभीर रुग्ण तपासणीवेळी विमानतळ, पोर्ट याठिकाणी, आयसीयू, क्रिटिकल केअर युनिट, ऑपरेशन थिएटर, कोरोनाग्रस्त गरोदर महिला बाळंतपण, मृतदेह पॅक करणे, श्वसनाचा अतिगंभीर रुग्ण casualty मध्ये पाहताना, लॅबोरेटरीमध्ये सॅम्पल घेताना, शवविच्छेदन करताना. याचवेळी संपूर्ण पीपीई किटचा वापर करायचा आहे.
स्वच्छ हात धुणे, हँड सॅनिटायझरचा वापर, सोशल डिस्टन्सिंग, श्वसनाच्या विकारांची काळजी घेणे, याला पीपीई किट हा पर्याय होऊ शकत नाही.