बेंगळूर/प्रतिनिधी
टोकियो ऑलिम्पिकमध्ये सुवर्णपदक मिळवत सुवर्ण कामगिरी करणाऱ्या भालाफेकपटू नीरज चोप्राची सध्या संपूर्ण देशभरात चर्चा सुरु असून कौतुकाचा वर्षाव केला जात आहे. सर्वसामान्यांपासून ते पंतप्रधान नरेंद्र मोदींपर्यंत प्रत्येकजण नीरज चोप्राच्या या जबरदस्त कामगिरीमुळे भारावले आहेत. दरम्यान, कर्नाटक राज्य मार्ग परिवहन महामंडळ (केएसआरटीसी) ने ऑलिम्पिक सुवर्णपदक विजेता भालाफेकपटू नीरज चोप्राला आजीवन गोल्डन पास देण्याची घोषणा केली आहे.
व्यवस्थापकीय संचालक शिवयोगी सी. कलसाद यांनी शनिवारी विजयाचा उत्सव साजरा करताना, त्यांनी नीरज चोप्राला आजीवन गोल्डन पास देण्याचा निर्णय घेतला. ते म्हणाले की, केएसआरटीसीच्या ६० व्या वर्धापन दिनानिमित्त महामंडळाने प्रथमच एखाद्या खेळाडूला आजीवन सुवर्ण पास देण्याची घोषणा केली आहे.