लोणावळा : मळवली पाटण भागात अनधिकृतपणे टोलेजंग इमारती बांधून नैसर्गिक ओढ्यानाल्यांचे प्रवाह अरुंद करणे, प्रवाह बदलणे असे प्रकार करणार्या बांधकामांवर आज PMRDA ने कारवाई करत संबंधित बांधकामे जमिनदोस्त केली.
मळवली पाटण भागातील नैसर्गिक ओढे-नाले अडविल्यामुळे मागील वषी या भागात मोठय़ा प्रमाणात पूर आला होता. मळवली भागातील हॅबेटेड येथील शेकडो घरे तसेच परिसरातील बंगले पाण्याखाली गेले होते. नागरिकांचे मोठे नुकसान झाले होते तर अनेक नागरिकांना घरातून रेस्क्यू करत बाहेर काढण्यात आले होते. यानंतर स्थानिक नागरिक, एकविरा कृती समिती, शिवभक्त विजय तिकोणे यांनी हा मुद्दा उचलून धरल्यानंतर मावळचे आमदार सुनिल शेळके, तहसीलदार, प्रांत यांच्यासह सर्व शासकीय यंत्रणांनी घटनास्थळी पाहणी करत अनधिकृत बांधकामे काढण्याच्या सूचना दिल्या होत्या. या घटनेला एक वर्ष झाले तरी कारवाई होत नसल्याने एकविरा कृती समितीने आंदोलनाचा इशारा दिला होता. तसेच विजय तिकोणे यांनी मागील पंधरवडय़ात या विषयावर आवाज उठवत भर पाण्यात उपोषणाला बसण्याचा इशारा दिला होता. यानंतर आज पीएमआरडीएने जेसीबी, पोकलॅन, ब्रेकर अशी यंत्रे पाठवत बांधकामे जमिनदोस्त केली.