ऑनलाईन टीम / काबुल :
वीस वर्षांच्या प्रदीर्घ युद्धानंतर अमेरिकन सैन्याने अफगाणिस्तानातून माघार घेतली आहे. सोमवारी रात्री उशिरा अमेरिकेच्या शेवटच्या विमानाने काबुलमधून उड्डाण केले. त्यानंतर तालिबानने देशाला स्वातंत्र्य मिळाल्याचा दावा करून फटाक्यांची आतिषबाजी अन् हवेत गोळीबार करून जल्लोष केला.
अमेरिकेने काबूल सोडल्यानंतर तालिबानने काबूल विमानतळ ताब्यात घेतले आहे. आता जर कोणाला देशाबाहेर जायचे असेल तर तालिबानच्या परवानगीनंतरच जाता येणार आहे. अफगाणिस्तानवर आता तालिबानचे पूर्णपणे नियंत्रण असणार आहे.
दरम्यान, अमेरिकेची 20 वर्षांपासून अफगाणिस्तानातील लष्करी उपस्थिती आता संपली आहे, असे अमेरिकेचे राष्ट्राध्यक्ष जो बायडेन यांनी जाहीर केले आहे. आपल्या कमांडर्सचे आभार मानत आणखी अमेरिकन नागरिकांचे आणखी जीव जाऊ न देता अफगाणिस्तानातून बाहेर काढले असे म्हटले आहे. तालिबानने अफगाणिस्तानवर कब्जा केल्यानंतर अमेरिकेने अफगाणिस्तानातून आतापर्यंत 1, 23,000 लोकांना बाहेर काढले आहे. त्यामध्ये अमेरिकन नागरिकांसह अफगाण नागरिकांचाही समावेश आहे.