बेंगळूर/प्रतिनिधी
कर्नाटकात कोविड -१९ च्या दुसर्या लाटेच्या भीतीमुळे लॉकडाऊन केला जाईल अशी चर्चा असताना राज्याचे आरोग्य व वैद्यकीय शिक्षणमंत्री डॉ. के सुधाकर यांनी कर्नाटकमधील लॉकडाऊनची भीती फेटाळून लावली. शनिवारी पत्रकारांशी बोलताना त्यांनी, सध्या राज्यात कोणत्याही भागात लॉकडाऊन होणार नाही, असे त्यांनी म्हंटले आहे.
मंत्री सुधाकर यांनी केलेल्या विधानाच्या अगोदर बेंगळूर महानगरपालिकेचे आयुक्त एन. मंजुनाथ प्रसाद यांनी म्हटले होते की, लोक कोविड -१९ च्या नियमांचे उल्लंघन करत राहिले तर पुन्हा लॉकडाऊन लागू केला जाऊ शकतो.
दरम्यान राज्यात कोरोनाची प्रकरणे केरळ किंवा महाराष्ट्र प्रमाणे इतक्या वेगाने वाढत नाहीत. पुन्हा लॉकडाऊन करण्यासारखी परिस्थिती नाही. राज्य सरकारकडे असा कोणताही प्रस्ताव किंवा कल्पनादेखील नाही. मंत्री सुधाकर यांनी केरळ आणि महाराष्ट्र, विशेषतः सीमावर्ती जिल्हा आणि बेंगळूरसारख्या भागात परिस्थितीला रोखण्यासाठी राज्य सरकार खबरदारीच्या उपाययोजना करीत आहे, असे ते म्हणाले.