क्रीडा प्रतिनिधी / मडगाव
गोव्याच्या तीन महिला फुटबॉलपटूंनी भारताचा राष्ट्रीय महिला फुटबॉल संघ निवडण्यासाठी जाहीर केलेल्या 30 संभाव्य फुटबॉलपटूंमध्ये स्थान मिळविले आहे. अखिल भारतीय फुटबॉल महासंघाने एएफसी महिला आशिया चषक 2022 स्पर्धेत भाग घेणाऱया संघाची निवड करण्यासाठी संभाव्य महिला फुटबॉलपटूंची यादी जाहीर केली असून यात गोव्याची बचावपटू सिंदिया सौंदत्तीकर, मीडफिल्डर वॅलनी फर्नांडिस आणि स्ट्रायकरच्या स्थानी खेळणाऱया करिश्मा शिरवईकर यांचा समावेश आहे.
भारतीय फुटबॉल संघ निवडण्यासाठी प्रशिक्षण शिबिर गोव्यात होईल. गोवा फुटबॉल संघटनेचे अध्यक्ष आणि आमदार चर्चिल आलेमाव, महिला फुटबॉल आणि स्पर्धा समितीच्या अध्यक्ष कॅरोल गोम्स आणि उपाध्यक्ष आर्नाल्ड कॉस्ता यांनी गोव्याच्या तिन्ही फुटबॉलपटूंचे अभिनंदन केले आहे.