देवरूख पूर फाटा येथील घटनेत तिघे जखमी
वार्ताहर/ ताम्हाने
देवरुख-रत्नागिरी मार्गावर टेम्पो आणि दुचाकीच्या अपघातात रोहित प्रकाश कांबळे (रा. णाळवाशी) हा तरुण ठार झाल्याची घटना बुधवारी घडली. हा अपघात पूर फाटय़ाजवळ दुपारी दीडच्या सुमारास घडला.
देवरुख पोलीस स्थानकातून मिळालेल्या माहितीनुसार, याची खबर टेम्पो चालक बंदेश कृष्णा कदम (किरदाडी कदमवाडी) यांनी दिली. ते आपल्या ताब्यातील टेम्पो घेऊन किरदाडीहून देवरुखला येत होते. यावेळी समोरून येणाऱया पल्सर दुचाकाशी समोरासमोर धडक झाली. खड्डे चुकवताना हा अपघात घडल्याचे सांगितले जात आहे. यात दुचाकीस्वार रोहित कांबळे गंभीर जखमी झाला. रोहित सोबतचे दत्ताराम शिवा करंडे, टेम्पोचालक बंदेश कदम व त्यांच्यासोबतचे सुभाष सुर्वे असे तिघेही या अपघातात जखमी झाले आहेत.
देवरुखचे पोलीस निरीक्षक मारुती जगताप, हेडकॉन्स्टेबल सचिन भुजबळराव, संतोष सडकर, किशोर जोयशी, जे. एस. तडवी, विश्वास बरगाळे, संदीप जाधव, सचिन पवार आणि प्रथमेश उकार्डे आदींनी घटनास्थळी जात जखमींना देवरुख ग्रामीण रुग्णालयात दाखल केले. रोहित गंभीर जखमी असल्याने त्याला जिल्हा शासकीय रुग्णालयात हलविण्यात आले. मात्र उपचारादरम्यान त्याची प्राणज्योत मालवली. या प्रकरणी अधिक तपास पोलीस नाईक जे. एस. तडवी करीत आहेत.