बेळगाव स्पोर्ट्स क्लब आयोजित साईराज चषक क्रिकेट स्पर्धा
क्रीडा प्रतिनिधी /बेळगाव
बेळगाव स्पोर्ट्स क्लब आयोजित साईराज चषक 12 वर्षांखालील आंतरक्लब क्रिकेट स्पर्धेत खेळविण्यात आलेल्या सामन्यातून आनंद अकादमीने युनियन जिमखान्याचा चार गडय़ांनी तर बीएससी ब संघाने अ संघाचा 2 गडय़ांनी पराभव करुन प्रत्येकी दोन गुण मिळविले. प्रज्योत उघाडे, अमर पटवेगार यांना सामनावीर पुरस्कार देण्यात आला.
व्हॅक्सिन डेपो मैदानावर खेळविण्यात आलेल्या पहिल्या सामन्यात युनियन जिमखान्याने युनियन जिमखानाने 25 षटकात 5 बाद 142 धावा केल्या. अर्जुन येळ्ळूरकरने 5 चौकारासह 43, शाहरुख धारवाडकरने 5 चौकारासह 45, सुरज सकरीने 16, अब्बास किल्लेदारने 11 धावा केल्या. आनंदतर्फे समर्थक रेड्डीने 2, अद्वैत चव्हाणने 1 गडी बाद केला. प्रत्युत्तरादाखल खेळताना आनंद अकादमीने 24.5 षटकात 6 बाद 146 धावा करुन सामना चार गडय़ांनी जिंकला. अमर पटवेगारने 25, अथर्व करडी व सुरज जुवेकर यांनी प्रत्येकी 22 धावा केल्या. जिमखानातर्फे सुरज सकरी व अद्वैत पाटीलने प्रत्येकी 2 तर महम्मद हमजाने 1 गडी बाद केला.
दुसऱया सामन्यात बीएससी अ संघाने 14 षटकात सर्व बाद 60 धावा केल्या. इम्तियाज मंडलने 10 धावा केल्या. बीएससी ब तर्फे अनिल बांडगीने 3, विवीन कामत व ओम आजरेकर यांनी प्रत्येकी 2 तर समर्थ व आयुष यांनी प्रत्येकी 1 गडी बाद केला. प्रत्युत्तरादाखल खेळताना बीएससी ब संघाने 22.1 षटकात 8 बाद 61 धावा करुन सामना दोन गडय़ांनी जिंकला. त्यात प्रज्योत उघाडेने 19, ओम आजरेकरने 16 धावा केल्या. बीएससी अ तर्फे अवनिश मुंगारेने 3, लक्ष्य खतायतने 2, काविश, प्रितम व इम्तियाज यांनी प्रत्येकी 1 गडी बाद केला. या स्पर्धेचे उपांत्य फेरीचे सामने शनिवारी खेळविण्यात येणार आहेत.