बेळगाव : कर्नाटक-गोवा बससेवेला शुक्रवारपासून सुरुवात होणार आहे. कोरोना संसर्गामुळे दोन्ही राज्यातील बससेवा बराच काळ बंद होती. मात्र, आता शुक्रवार दि. 4 पासून कर्नाटक-गोवा बससेवा सुरू करण्यात येत असल्याची माहिती परिवहन मंडळाने दिली आहे.
परिवहन मंडळाने परवानगी दिल्याने अनलॉक चौथ्या टप्प्यात आंतरराज्य बससेवा सुरू होत आहे. त्यामुळे दोन्ही राज्यातील प्रवाशांना दिलासा मिळाला असला तरी कोरोनाच्या नियमांचे पालन करून प्रवास करावा लागणार आहे. सामाजिक अंतर राखून एका बसमध्ये मर्यादित प्रवाशांना प्रवास करता येणार आहे. प्रवासादरम्यान मास्क लावणे बंधनकारक असून प्रवासासाठी बसेस सॅनिटायझर करून वापरल्या जाणार असल्याची माहिती परिवहन मंडळाने दिली आहे.