जवळपास 413.75 कोटींचा करार : 1.5 दशलक्ष टन क्षमतेचे युनिट : दक्षिणेत विस्तार
वृत्तसंस्था/ नवी दिल्ली
गौतम अदानी यांच्या अंबुजा सिमेंट्सने दक्षिण भारतात आपली पकड मजबूत करण्यासाठी मोठे पाऊल उचलले आहे. कंपनीने नुकतेच जाहीर केले की त्यांनी तामिळनाडूमध्ये 413.75 कोटी रुपयांना ग्राइंडिंग युनिट घेण्याचा करार केला आहे. या अधिग्रहणामुळे अंबुजा सिमेंटला तुतिकोरिनमध्ये वार्षिक 1.5 दशलक्ष टन क्षमतेचे नवीन ग्राइंडिंग युनिट मिळेल, असे कंपनीने एका निवेदनात म्हटले आहे.
हे युनिट माय होम इंडस्ट्रीजचे आहे, जे तामिळनाडूमध्ये आहे. या संपादनासाठी अंतर्गतरित्या निधी दिला जाणार आहे आणि अदानी समूहाची सिमेंट क्षमता 78.9 एमटीपीएपर्यंत नेली जाईल, असे कंपनीने म्हटले आहे.
कंपनीला विश्वास आहे की, या अधिग्रहणामुळे तामिळनाडू आणि केरळच्या दक्षिणेकडील बाजारपेठेतील किनारपट्टीपर्यंत व्यवसायाला पोहोचण्यास मदत होणार आहे. अंबुजा सिमेंटला तामिळनाडूमधील चुनखडीच्या कमतरतेचा वेगळा फायदा होईल, असे निवेदनात पुढे म्हटले आहे. ते किनाऱ्यालगत असलेल्या संघीपुरम प्रकल्पमधून क्लिंकर कार्यक्षमतेने पाठवू शकतात, ज्यामुळे खर्च कमी होतो. अंबुजा सिमेंटने गेल्या वर्षी संघी इंडस्ट्रीजकडून संघीपुरम प्लांट विकत घेतला होता.
अदानी सिमेंटचे मुख्य कार्यकारी अधिकारी अजय कपूर म्हणाले की अंबुजा सिमेंट तामिळनाडूमधील अधिग्रहित ग्राइंडिंग युनिटसाठी विद्यमान डीलर नेटवर्क आणि कर्मचारी कायम ठेवेल. त्यांना विश्वास आहे की या हालचालीमुळे संक्रमण सुलभ होईल आणि युनिटचा वापर जलद वाढेल असा दावाही यावेळी त्यांनी केला आहे.
अदानी सिमेंट सध्या त्यांच्या एकूण सिमेंट विक्रीपैकी 10 टक्के दक्षिणेकडील बाजारपेठेत विकते. म्हणजेच कंपनीचे दक्षिणेत योगदान तुलनेने खूप कमी आहे. तामिळनाडूमध्ये ग्राइंडिंग युनिटच्या अधिग्रहणाची सोमवारी अदानीची घोषणा अशा वेळी आली आहे जेव्हा अल्ट्राटेक सिमेंट, दालमिया भारत (सिमेंट) आणि श्री सिमेंट यांसारख्या प्रतिस्पर्धी कंपन्या दक्षिण भारतात त्यांच्या सिमेंट क्षमतेचा विस्तार करण्यात व्यस्त आहेत. उद्योग विश्लेषकांचे म्हणणे आहे की केंद्र आणि राज्य या दोन्ही स्तरावरील अनेक सरकारी प्रकल्पांमुळे सिमेंट उत्पादक दक्षिण भारतीय बाजारपेठेकडे आकर्षित झाले आहेत.