बेळगाव : शहरातील रस्तेखोदाईचे ग्रहण अद्याप काही सुटलेले नाही. या ना त्या कारणाने महिन्यातून एक-दोनदा खोदाई केलीच पाहिजे, असा जणू दंडकच घालण्यात आला आहे. हिंदवाडी कॉर्नर येथे पुन्हा एकदा रस्त्याची खोदाई करण्यात आली असून यामुळे येण्या-जाण्यास नागरिकांना अडथळा निर्माण होत आहे. त्यामुळे अजून किती वेळा याच ठिकाणी खोदाई करणार, असा प्रश्न स्थानिक विचारत आहेत. गोवावेस येथील डाक बंगल्याशेजारी असणाऱ्या हिंदवाडी कॉर्नरवर मागील अनेक दिवसांपासून खोदाई करण्यात आली होती. कधी ड्रेनेजसाठी तर कधी पाण्याच्या वाहिनीसाठी तर कधी कधी गॅस आणि विद्युत वाहिन्यांसाठी वरचेवर खोदाई केलीच जाते. यामुळे हिंदवाडीतून शहापूरच्या दिशेने येणाऱ्या वाहनचालकांना अडथळा निर्माण होत आहे. गोवावेस येथील कॉर्पोरेशन कॉम्प्लेक्समागे असणाऱ्या रोडवर वाहिन्या घालण्यासाठी आता पुन्हा एकदा खोदाई करण्यात आली आहे.या वरचेवर होणाऱ्या खोदाईचा परिणाम परिसरातील व्यापाऱ्यांच्या उद्योगावरही होत आहे. शिवाय पावसाळ्याच्या तोंडावर केल्या जाणाऱ्या या खोदाईमुळे चिखलाचे साम्राज्य निर्माण होऊन सर्वसामान्य जनतेलाही हालअपेष्टा सोसाव्या लागणार त्या वेगळ्याच. त्यामुळे मोठ्या पावसाला सुरुवात होण्यापूर्वीच दुरुस्तीचे काम पूर्ण करावे, अशी मागणी केली जात आहे.
Tarun Bharat Portal
Amit Kulkarni a versatile content writer, scriptwriter, and content producer at Tarun Bharat Media. Specializes in sports news, local news entertainment, national news and astrology content. His captivating storytelling and deep industry knowledge make him an expert in crafting engaging narratives.
Add A Comment
