एखादे मूल जेव्हा स्वतःच्या आईवडिलांकडे पैशांचा हट्ट करते, तेव्हा त्याचे आईवडिल त्याला पैसे झाडावर उगवत नसल्याचे सांगतात. परंतु जगात एका झाडावर खरोखरच पैसे उगवतात. प्रत्यक्षात ग्रेट ब्रिटनमधील एका झाडामधून हजारोंच्या संख्येत नाणी बाहेर पडली आहेत. हे झाड तेथील पीक डिस्ट्रिक्टमध्ये आहे. हे झाड काही 10 किंवा 20 वर्षांचे नसून 1700 वर्षे जुने असल्याचे सांगण्यात येते. पण ही नाणी या झाडामधून उगवली नसून लोकांनी तेथे रोवली आहेत. या झाडावर केवळ ब्रिटनची नव्हे तर जगभरातील देशांची नाणी दिसून येतात.
हे अनोखे झाड वेल्सच्या पोर्टमेरियन गावात असून हे ठिकाण आता प्रसिद्ध पर्यटनस्थळ ठरले आहे. या झाडावर नाणी रोवण्यासाठी ठिकठिकाणाहून लोक येत आहेत. या झाडावर आता नाणी रोवण्यासाठी जागाच उरलेली नाही. या झाडावर नाणी ठेवल्याने मनातील इच्छा पूर्ण होतात, घरात सुख-समृद्धी येते, असे अनेकांचे मानणे आहे. या झाडात एखाद्या दैवीशक्तीचा वास असल्याचीही वदंता आहे. नाताळावेळी या झाडानजीक मिठाई आणि भेटवस्तू ठेवल्या जातात. प्रेमी जोडपे नात्यात मधुरपणा येण्यासाठी येथे नाणी ठेवतात.