प्रतिनिधी / मुंबई
केंद्रीय अमली पदार्थ विरोधी विभागाने बॉलिवूडच्या ड्रग्ज तस्कराविरोधात जोरदार मोहीम उघडली आहे. याप्रकरणात अभिनेता अर्जुन रामपालवर अटकेची टांगती तलवार आहे. एनसीबीच्या छाप्यावेळी अर्जुनने प्रतिबंधित औषधांसंबंधी दाखविलेले डॉक्टरांचे प्रीक्रिप्शन जुने असल्याचे तपासात समोर आल्याने, एनसीबीने त्याच्या भोवती मुसक्या आवळण्यास सुरुवात केली आहे.
एका आफ्रिकन दलालामार्फत ऍजिसिलाओस डिमिट्रिटास याची माहिती मिळाली होती. एनसीबीने क्षेत्रीय संचालक समीर वानखेडे यांच्या नेतफत्वात ऍजिसिलाओसला लोणावळय़ातील एका रिसॉर्टमधून अटक केली होती. ऍजिसिलाओसची बहीण गॅब्रिएला ही अर्जुनची मैत्रिण आहे. त्याच्याकडील माहितीच्या आधारे एनसीबीने अर्जुनच्या खार येथील घरी छापा टाकला. या छाप्यादरम्यान त्याच्या घरी प्रतिबंधित औषधे सापडली होती. त्यावेळी अर्जुनने ही औषधे डॉक्टरांच्या सल्ल्याने घेत असल्याचा दावा केला होता. परंतु, त्यात घोळ असल्याने एनसीबीने त्याला चौकशीला बोलविले असता, समाधानकारक उत्तरे मिळाली नाहीत. यामुळे पुन्हा एकदा त्याची चौकशी करण्यात येणार आहे.