ममता बॅनर्जी भवानीपूरमधून लढणार
कोलकाता / वृत्तसंस्था
पश्चिम बंगालमधील तीन जागांवर होणाऱया विधानसभा पोटनिवडणुकीसाठी तृणमूल काँग्रेसने रविवारी उमेदवारांची घोषणा केली आहे. मुख्यमंत्री ममता बॅनर्जी भवानीपूर मतदारसंघातून निवडणूक लढवणार आहेत. तर अमिरूल इस्लाम यांना समसेरगंज आणि झाकीर हुसेन यांना जंगीपूरमधून उमेदवारी देण्यात आली आहे. या तीन जागांसाठी 30 सप्टेंबर रोजी निवडणुका होणार असून मतमोजणी 3 ऑक्टोबर रोजी केली जाणार आहे.
पश्चिम बंगालमधील समसेरगंज आणि जंगीपूर जागा आमदारांच्या मृत्यूनंतर रिक्त झाल्या, तर भवानीपूरचे तृणमूलचे आमदार सोवनदेब चट्टोपाध्याय यांनी ममता बॅनर्जी यांच्यासाठी राजीनामा देत जागा रिक्त केली होती. बंगाल निवडणुकीत नंदिग्राम मतदारसंघात ममता बॅनर्जी यांचा भाजपच्या सुवेंदू अधिकारी यांनी पराभव केला. त्यानंतर टीएमसीच्या विधिमंडळ पक्षाने ममतांची मुख्यमंत्री म्हणून निवड केली होती. साहजिकच आता शपथ घेतल्यापासून 6 महिने पूर्ण होण्यापूर्वी त्यांना आमदार म्हणून निवडून येणे क्रमप्राप्त आहे.