प्रतिनिधी / सातारा :
जिल्हा बँकेत राष्ट्रवादी काँग्रेस पुरस्कृत पॅनेल टाकण्याचा निर्णय अंतिम झाला आहे. या पॅनेलमध्ये भाजपाचे आमदार शिवेंद्रराजेंना सामावून घेण्याचाही निर्णय झाला आहे. दरम्यान, पॅनेलच्या इच्छूकांच्या याद्या तयार असून जागा वाटपाचा तिढा अद्याप सुटलेला नाही. आमदार शिवेंद्रराजेंनी पाच जागांची मागणी केली आहे. तर चार जागा आमदार मकरंद पाटील यांनी मागितल्या आहेत. पालकमंत्री बाळासाहेब पाटील यांनीही जागांची मागणी केली आहे. त्यामुळे सगळय़ांचा तिढा रामराजे कसे सेडविणार याकडे लक्ष लागून राहिले आहे. दरम्यान, विरोधकांनी अद्यापही चुप्पी साधली आहे.
जिल्हा मध्यवर्ती बँकेच्या निवडणूकीमध्ये राष्ट्रवादी काँग्रेसकडून परफेक्ट प्लॅनिंग करण्यात आले आहे. पुण्यामध्ये सातारच्या जिल्हा बँकेच्या अनुषंगाने बैठक पार पडली. त्या बैठकीमध्ये राष्ट्रवादीचे पॅनेलवर निर्णय झाला. त्याच पॅनेलमध्ये भाजपाचे आमदार शिवेंद्रराजेंना सोबत घ्यायचा निर्णय झाला. परंतु जागा वाटपाचा तिढा अद्याप कायम आहे.