सभापती रमेश तवडकर यांची माहिती
प्रतिनिधी /पणजी
जानेवारी महिन्याच्या पहिल्या किंवा दुसऱया आठवडय़ात विधानसभेचे हिवाळी अधिवेशन होणार असल्याचे सभापती रमेश तवडकर यांनी सांगितले. हे अधिवेशन कमी कालावधीचे असणार असून, सहा दिवसात आटोपते घेतले जाईल. येत्या आठ दिवसात अधिवेशनाची तारीख व कालावधी ठरविण्यात येणार असल्याचेही सभापती तवडकर यांनी सांगितले.
काल मंगळवारी पणजीत घेतलेल्या पत्रकार परिषदेत सभापती रमेश तवडकर बोलत होते. यावेळी त्यांच्यासोबत अन्य मान्यवर उपस्थित होते. काँग्रेसमधून भाजपात गेलेल्या आठ आमदारांविरुद्ध सभापतीसमोर जी याचिका मांडण्यात आली आहे, त्याबाबत विचारले असता तवडकर म्हणाले की याचिकेवर आपण अभ्यास केला असून, येत्या आठ ते दहा दिवसात वादी आणि प्रतीवाद यांना नोटीस बाजवली जाणार आहे. याचिकेवर सुनावणी घेण्यास एवढा उशीर का झाला, असे विचारले असता, सुनावणी घेण्यास उशीर झालेला नाही, असे सांगून त्यांनी याचिका विषयावर अधिक बोलण्याचे टाळले.